1Password-ი AI აგენტებს პაროლების ნახვის გარეშე ანგარიშებში შესვლის საშუალებას აძლევს

1Password-ი ახალ ფუნქციას ნერგავს, რომლის საშუალებითაც AI აგენტები თქვენს ანგარიშებში შესვლას პაროლების ნახვისა და გამოყენების გარეშე შეძლებენ. 1Password for Agents ბოტებს ყველა დაკავშირებულ ანგარიშზე შეუზღუდავ წვდომას არ აძლევს. შესვლის თითოეულ მოთხოვნას თანხმობა კვლავ დასჭირდება. თუმცა, ეს გაამარტივებს აგენტების გამოყენებას ისეთი დავალებებისთვის, რომელთა შესასრულებლადაც სხვადასხვა სერვისში შესვლაა საჭირო.

„აგენტები უკვე ჩვენ ნაცვლად რეალურ სამუშაოს ასრულებენ. ძველი მოდელი, როცა ვინმეს ავტორიზაციის მონაცემებს გადასცემ და იმედოვნებ, რომ ყველაფერი კარგად ჩაივლის, აღარ მუშაობს“, 1Password-ის აღმასრულებელმა დირექტორმა ააშიშ ტრიპათიმ პრესრელიზში განაცხადა. „აგენტს უნდა შეეძლოს მისთვის მიცემული დავალების შესრულება ისე, რომ ანგარიშის უკან არსებულ ყველაფერზე მუდმივი წვდომა არ ჰქონდეს. 1Password კი ნდობის ფენას ქმნის, რაც პირადი აგენტების გამოყენებისას ამ შესაძლებლობას უზრუნველყოფს“.

ახალ სისტემაში AI აგენტი უნიკალურ ციფრულ გასაღებს იყენებს, რათა შესვლის ფორმასთან მისვლისას 1Password-ს საკუთარი ვინაობა დაუდასტუროს. ამის შემდეგ აპლიკაცია შეტყობინებას გიგზავნით და გატყობინებთ, რომელი ანგარიშის მონაცემები სჭირდება აგენტს და რატომ. თუ მოთხოვნას დაეთანხმებით, 1Password საჭირო შესვლის მონაცემებს თავად შეავსებს და აგენტს არ გადასცემს. თანხმობას თქვენს მოწყობილობაზე გასცემთ, რაც უზრუნველყოფს, რომ წვდომას თავად აკონტროლებთ. პროცესი ორფაქტორიანი ავთენტიფიკაციის მსგავსია. ანგარიშში შესვლის შემდეგ აგენტი დავალებას ისე განაგრძობს, რომ თქვენს პაროლს ვერასოდეს ნახავს.

1Password-ის თქმით, წვდომის სისტემა სხვადასხვა პოპულარულ AI აგენტთან იმუშავებს, მათ შორის Meta Muse-თან, ChatGPT Work-თან, Dots-თან, Claude Duet-თან, Grok Bot-თან და Town-თან. კომპანია აცხადებს, რომ სხვა პარტნიორებიც მუშაობენ 1Password for Agents-ის მხარდაჭერის დანერგვაზე. მათ შორის არიან Browserbase, Browser Use, Dana, Instinct, Kernel, Perplexity, Ramp, Tomo და Wajo. კომპანია წერს, რომ „სხვა ინტეგრაციებიც დაემატება“.