Amazon-ი ინდიანაში ახალ ატომურ ელექტროსადგურს დააფინანსებს

ობიექტის მშენებლობის ან ამოქმედების ვადები არ გამოცხადებულა. Amazon-ის განცხადებით, პროექტმა შესაძლოა 1 000 დროებითი სამშენებლო სამუშაო ადგილი და 100 მუდმივი სამუშაო ადგილი შექმნას. ინდიანის ობიექტზე 12 მცირე მოდულური Xe-100 რეაქტორის აშენება იგეგმება. ეს მოწინავე, თუმცა ჯერ გამოუცდელი რეაქტორი კვლავ შემუშავებისა და ლიცენზირების პროცესშია. რეაქტორების გაგრილება ჰაერით, წყლით ან ორივეს შერწყმითაა შესაძლებელი. Amazon-ის თქმით, ამის გამო მათი განთავსება წყლის დეფიციტის მქონე რეგიონებშიც იქნება შესაძლებელი, ადგილობრივ თემებში წყალზე მოთხოვნის გაზრდის გარეშე.

ინდიანაში ასევე მდებარეობს მარბლ-ჰილის ატომური ელექტროსადგური (Marble Hill Nuclear Power Plant), რომელიც მაღალი ღირებულებითა და დაუსრულებელი მშენებლობითაა ცნობილი. პროექტი 1983 წელს ნახევრად დასრულებული მიატოვეს, მას შემდეგ, რაც მასში უკვე 2,5 მილიარდი დოლარი დახარჯეს. ობიექტის დემონტაჟი 2008 წლიდან გრძელდება. ფეირბენქსის პროექტთან დაკავშირებული შეთანხმების პირობები Amazon-ს არ გამოუქვეყნებია. შესაბამისად, ორი ობიექტის ღირებულების შედარება შეუძლებელია.

ეს Amazon-ისა და X-energy-ს მეორე ერთობლივი ბირთვული ენერგიის პროექტია. კომპანიების საერთო მიზანია რეგიონულ კომუნალურ კომპანიებთან თანამშრომლობით, 2039 წლისთვის აშშ-ში 5 გიგავატზე მეტი ახალი ბირთვული სიმძლავრე განათავსონ. გასული წლის ოქტომბერში Amazon-მა ვაშინგტონის შტატში დაგეგმილი პირველი ატომური ელექტროსადგურის, კასკადის მოწინავე ენერგეტიკული ობიექტის (Cascade Advanced Energy Facility), პირველადი გეგმა წარადგინა. პროექტიც 12 მოწინავე რეაქტორის აშენებასა და ადგილობრივი სამუშაო ადგილების შექმნას ითვალისწინებს. თუმცა მშენებლობის დაწყებას ამ ათწლეულის ბოლომდე არ ელიან.

Amazon-ი ერთ-ერთია იმ რამდენიმე ტექნოლოგიურ კომპანიას შორის, რომლებიც ხელოვნური ინტელექტის მონაცემთა ცენტრების ენერგიით მოსამარაგებლად საკუთარ ბირთვულ პროექტებს განიხილავენ. მათ შორის Meta, Microsoft-ი და Google-იც არიან. ენერგეტიკული ქსელის ინფრასტრუქტურაში ინვესტირება იმ ვალდებულებებს შორისაცაა, რომლებიც Amazon-მა ამ თვის დასაწყისში ვრცელ ბლოგპოსტში ჩამოაყალიბა. კომპანია მონაცემთა ცენტრების პროექტების მიმართ მზარდი უარყოფითი დამოკიდებულების შემცირებას ცდილობდა. თუმცა წლები გავა, ვიდრე ვინმე, მათ შორის Amazon-ი, ამ ახალი ობიექტებით სარგებელს მიიღებს.