ანგარიშის თანახმად, ინგლისური კლუბების უმეტესობა ფინანსურ ზღვარზეა

IFR-მა აღნიშნა, რომ ინგლისური ფეხბურთისადმი საერთაშორისო ინტერესი და ინვესტიციები იზრდება. თუმცა, საფეხბურთო პირამიდის საფუძველი ძლიერი წნეხის ქვეშაა და სასწრაფო რეფორმას საჭიროებს.

გასულ სეზონში ინგლისურმა ფეხბურთმა 9 მილიარდ ფუნტზე მეტი შემოსავალი მიიღო, თუმცა ხუთ უმაღლეს დივიზიონში კლუბების 94% ზარალზე მუშაობდა. მეტოქეებთან კონკურენციისთვის გადაჭარბებული მოკლევადიანი ხარჯები მათ გრძელვადიან უსაფრთხოებას საფრთხეს უქმნის. IFR-ის თანახმად, ამან ვალის ზრდისა და მფლობელთა დაფინანსებაზე გადაჭარბებული დამოკიდებულების სახიფათო კომბინაცია შექმნა, რაც კლუბებსა და გულშემატკივრებს აზარალებს.

ანგარიში აღიარებს, რომ პრემიერ-ლიგის წარმატებამ ეკონომიკურ წინსვლას შეუწყო ხელი და ინგლისური ფეხბურთი „მსოფლიოში ყველაზე მდიდარ, საუკეთესო და ყველაზე კონკურენტულ“ სისტემად აქცია.

თუმცა, ლიგებს შორის და მათ შიგნით ფინანსური უფსკრულია. პრემიერ-ლიგის საშუალო კლუბის შემოსავალი ჩემპიონშიფის საშუალო კლუბისას რვაჯერ მეტად აღემატება. პრემიერ-ლიგიდან გავარდნილი კლუბებისთვის განკუთვნილი კომპენსაციებიც ჩემპიონშიფის გუნდებს გადაჭარბებული ხარჯვისკენ უბიძგებს. ფეხბურთელთა ხელფასების ზრდის გამო კლუბები პრემიერ-ლიგაში მოსახვედრად დიდ რისკებს იღებენ.

საფეხბურთო პირამიდის ქვედა ნაწილშიც საოპერაციო ხარჯები იზრდება. ინგლისის საფეხბურთო ლიგისა (English Football League, EFL) და ეროვნული ლიგის 17 კლუბის ხარჯებმა შემოსავალს გადააჭარბა. ეს კლუბები ფეხბურთელებისთვის ხელფასის გადახდის გარეშეც ზარალზე იმუშავებდნენ.

ანგარიშის თანახმად, EFL-ისა და ეროვნული ლიგის კლუბების 60%-ზე მეტი ტექნიკურად გადახდისუუნაროა. მათი ვალდებულებები აქტივების საბალანსო ღირებულებას აღემატება. მფლობელთა დაფინანსების შეწყვეტის შემთხვევაში კლუბების მეოთხედზე მეტი ერთ თვეზე მეტხანს ვერ გაძლებდა. უმეტესობას რისკის შესამცირებლად საბაზისო საგანგებო გეგმაც არ აქვს.

IFR-ის თავმჯდომარემ დევიდ კოგანმა Sky-ს განუცხადა: „ინგლისურ ფეხბურთში ორ სრულიად განსხვავებულ მდგომარეობას ვხედავთ. ყოველწლიურად 9 მილიარდი ფუნტი შემოდის, თუმცა ჩვენს მიერ რეგულირებული 160 კლუბის 94% ზარალზე მუშაობს“.

კოგანმა თქვა: „32 კლუბის ანგარიშებზე 30 დღეზე ნაკლები პერიოდისთვის საკმარისი ფულია. თუ მფლობელი წავა ან გარდაიცვლება, ისინი გადახდისუუნარო გახდებიან და გაკოტრდებიან“.

მისი თქმით, ფეხბურთში ვალი იზრდება, კლუბებს ფულადი მარაგისა და ლიკვიდობის პრობლემა აქვთ, ფინანსური მართვა კი არასაკმარისია. კოგანმა დასძინა, რომ მარეგულირებელს ახლა შეუძლია, კლუბებს უფრო სტაბილური მომავლის შექმნაში დაეხმაროს.

კოგანმა აღნიშნა: „დღეს პრემიერ-ლიგაში, EFL-ში და მათ კლუბებში საკმარისი თანხა მოძრაობს. სწორედ ახლა უნდა გადავჭრათ სტრუქტურული პრობლემები, რადგან შემოსავლების შემცირების შემთხვევაში კლუბები სერიოზულ გასაჭირში აღმოჩნდებიან“.