Anthropic-ი გამოთვლით რესურსებში 567 მილიარდ დოლარამდე ინვესტირებას გეგმავს

კომპანიამ ასევე შექმნა „საკუთარი ორკესტრირების შრე“, რომელიც სხვადასხვა ღრუბლოვან მომწოდებელთან გამოყენებულ ჩიპებზე სამუშაო დატვირთვას ანაწილებს. მათ შორისაა AWS Trainium, Google-ის TPU-ები, Nvidia-სა და AMD-ის გრაფიკული პროცესორები. კომპანიის თქმით, ასეთი ინტელექტუალური მარშრუტიზატორის შექმნას Anthropic-ს „მნიშვნელოვანი ინვესტიციით რამდენიმე წელი“ დასჭირდა. ის კომპანიას ხარჯების შემცირებასა და რომელიმე ერთ მომწოდებელზე დამოკიდებულების შემცირებაში ეხმარება.

თუმცა, S-1-ის თანახმად, Anthropic-ის ურთიერთობა Amazon-თან, Google-თან და Microsoft-თან „მრავალმხრივი და რთულია“. ეს მომწოდებლები Anthropic-ის კონკურენტებიც არიან და საკუთარი ხელოვნური ინტელექტის პროდუქტებისთვის გამოთვლითი რესურსები სჭირდებათ. ამიტომ მათ შესაძლოა „საკუთარ საჭიროებებს მიანიჭონ უპირატესობა“. მათ ასევე შეიძლება „მიიღონ წარმოდგენა“ Anthropic-ის ბიზნესის მუშაობასა და მის გამოთვლით საჭიროებებზე, რაც „კონკურენტულ სტრატეგიებზე გავლენას მოახდენს“. ამ რთულ ურთიერთობებს ისიც ემატება, რომ Microsoft-მა, Amazon-მა და Google-მა Anthropic-ში „მნიშვნელოვანი“ ინვესტიციები ჩადეს და შესაძლოა მომავალშიც გააგრძელონ. ამ კომპანიებს Anthropic-ის პროდუქტებიც აქვთ შეძენილი და მის მოდელებს იყენებენ.

კონკურენტებზე დამოკიდებულების შესამცირებლად Anthropic-ი გამოთვლითი რესურსების ახალ სტრატეგიას, Anthropic Direct-ს, ახორციელებს. S-1-ის თანახმად, ეს, არსებითად, კომპანიის საკუთარი მონაცემთა ცენტრების შექმნას გულისხმობს. Anthropic-ის მოლოდინით, დროთა განმავლობაში Direct-ის ინიციატივა მის „გამოთვლით ინვესტიციებში მზარდ წილს“ დაიკავებს და „გრძელვადიან ეკონომიკურ უპირატესობებს“ მოიტანს.

კომპანიამ Anthropic Direct-ისთვის შესყიდვის ვალდებულებების აღება და იჯარის ხელშეკრულებების გაფორმება დაახლოებით 2026 წლის 30 სექტემბრიდან დაიწყო. მესამე მხარის პარტნიორები უძრავ ქონებას, ელექტროენერგიასა და ობიექტებს უზრუნველყოფენ და მონაცემთა ცენტრებს მუდმივად მართავენ. Anthropic-ი მათგან საჭირო გამოთვლით რესურსებს იჯარით აიღებს. ხუთწლიანი იჯარის გადასახდელი თანხა, პროცენტის გამოკლებით, 125,2 მილიარდი დოლარია.

2026 წელს Anthropic-ის ყველაზე დიდი ინფრასტრუქტურული პარტნიორი Broadcom-ია, რომლისგანაც პოტენციური დაფინანსება 42 მილიარდ დოლარს შეადგენს. შემდეგ მოდის Google 20 მილიარდი დოლარით, ხოლო Amazon-ი, 15 მილიარდი დოლარით. ამ ამბის შემდეგ Broadcom-ის აქციების ფასი დღეს 3%-ით გაიზარდა.

ამ მიდგომის უარყოფითი მხარე ისაა, რომ Anthropic-მა ეს ხარჯები წინასწარ უნდა გადაიხადოს და ინვესტიციიდან სწრაფ უკუგებას ვერ მიიღებს. ამის გამო კომპანიამ S-1-ში განაცხადა, რომ ელოდება „მნიშვნელოვან ფულად გადინებას“, რამაც შესაძლოა „უარყოფითად იმოქმედოს ჩვენს ლიკვიდობაზე, ფინანსურ მდგომარეობასა და საოპერაციო შედეგებზე“.

მონაცემთა ცენტრების ელექტროენერგიით მომარაგებაც კიდევ ერთი მნიშვნელოვანი საკითხია. S-1-ის თანახმად, Anthropic-ი „ენერგიის მნიშვნელოვან მოთხოვნას“ ელის. ამისთვის კომპანიამ ელექტროენერგიის წარმოებისა და ინფრასტრუქტურის შესახებ ხელშეკრულებები გააფორმა, თუმცა არ დაუკონკრეტებია, რა ტიპის შეთანხმებები ან ენერგიის რომელი წყარო იგულისხმება. კომპანიის თქმით, ყველაზე დიდი რისკი ელექტროენერგიის მონაცემთა ცენტრამდე მიყვანაა. ნებართვების მიღებამ, სამართლებრივმა დავებმა, მიწოდების ჯაჭვის შეფერხებებმა და სხვა ფაქტორებმა ეს პროცესი შეიძლება შეაფერხოს.

სხვა დეფიციტმაც შეიძლება Anthropic-ის წარმატებაზე იმოქმედოს, მათ შორის ჩიპებისა და მონაცემთა ცენტრების აღჭურვილობის ნაკლებობამ. თუმცა Anthropic-სა და ხელოვნური ინტელექტის ყველა კომპანიას ამ გამოწვევებთან გამკლავება მოუწევს, წინააღმდეგ შემთხვევაში კი წარუმატებლობის საფრთხე შეექმნება.

განაცხადში ნათქვამია: „თუ მონაცემთა ცენტრების ინფრასტრუქტურის ინიციატივებს წარმატებით ვერ განვახორციელებთ, მნიშვნელოვანი შეფერხებები ან ხარჯების გადაჭარბება გვექნება, ან იჯარით აღებული, დანერგილი თუ აშენებული ინფრასტრუქტურა ჩვენს ცვალებად საჭიროებებს ვერ დააკმაყოფილებს, შესაძლოა ამ ინვესტიციებისგან მოსალოდნელი სარგებელი ვერ მივიღოთ. ამან კი შესაძლოა უარყოფითად იმოქმედოს ჩვენს ბიზნესზე, ფინანსურ მდგომარეობასა და საქმიანობის შედეგებზე“.

თემებიილონ მასკიAmazonAMDAnthropicGoogleMicrosoftNvidiaSpaceXაშშ-ის ფასიანი ქაღალდებისა და ბირჟების კომისიაAWS Trainium

გამოქვეყნდა 26 ოქტომბერი, 2026