Anthropic-ის პროსპექტში 16,3 მილიარდი დოლარის შემოსავალი და 80,7 მილიარდი დოლარის წმინდა ზარალია

კომპანიამ S-1 დოკუმენტში დაწერა: „ჩვენი მიზანია, კაცობრიობას დავეხმაროთ ამ ტექნოლოგიურ გარდაქმნაში უსაფრთხო გზის გაკვლევაში, აღმოჩენების ახალი საზღვრების გახსნასა და სასწაულების ეპოქის მოტანაში“. S-1 არის აშშ-ის ფასიანი ქაღალდებისა და ბირჟების კომისიის ფორმა, რომელსაც კომპანია IPO-ს პროსპექტისთვის წარადგენს.

Anthropic-ის ფინანსური მდგომარეობის სხვადასხვა დეტალი უკვე გაჟონა დოკუმენტის სამუშაო ვერსიებიდან და პოტენციური ინვესტორებისთვის გამართული პრეზენტაციებიდან.

კომპანიის რისკების განყოფილება 300-გვერდიანი დოკუმენტის დაახლოებით 94 გვერდს მოიცავს. იქ აღწერილია ყველაფერი, მსხვილ კლიენტებზე Anthropic-ის დამოკიდებულებიდან დაწყებული, ომის დეპარტამენტთან მიმდინარე სამართლებრივი დავით დამთავრებული. 2026 წლის პირველი ცხრა თვის განმავლობაში კომპანიის ხუთ უმსხვილეს კლიენტზე შემოსავლის დაახლოებით 25% მოდიოდა. შემოსავლის თითქმის ნახევარი კი ღრუბლოვანი მომსახურების ბაზრებიდან მიიღებოდა, რომლებსაც Amazon, Google და Microsoft მართავენ. ეს კომპანიები Anthropic-ს მომხმარებლებისთვისაც ეჯიბრებიან.

Anthropic-მა გაამჟღავნა უსაფრთხოების ტესტირებისას მომხდარი შემთხვევებიც, როცა მისმა მოდელმა რეალურ გარე სისტემებზე არასანქცირებული წვდომა მოიპოვა. კომპანიის შეფასებით, წელს შემოსავლის 5%-დან 7%-მდე იმ კლიენტებზე მოდიოდა, რომლებიც მოგვიანებით გამოყენების წესების დამრღვევებად გამოვლინდნენ.

ერთ-ერთ გაფრთხილებაში Anthropic-მა აღნიშნა, რომ თუ თანამშრომლები, რომელთა დიდი ნაწილი კომპანიის უსაფრთხოების მისიამ მიიზიდა, ჩათვლიან, რომ კომპანია ამ ღირებულებებს აღარ იცავს, შესაძლოა მათი მოტივაცია შემცირდეს, თანამშრომლებმა სამსახური დატოვონ და ახალი კადრების მოზიდვა გართულდეს. ამან კი შესაძლოა კომპანიის მუშაობა შეანელოს.

გასულ თვეში Anthropic-ის თანამშრომელმა ჯეიკობ კოქსონმა კომპანიიდან წასვლისას განაცხადა, რომ კომპანია და ხელოვნური ინტელექტის მთელი ინდუსტრია მოდელების შექმნისას უპასუხისმგებლოდ მოქმედებდნენ და „ჩვენი სიცოცხლით თამაშობდნენ“.

ლაბორატორია მოკლედ ეხება ხელოვნური ინტელექტის მიერ წარმოქმნილ ზოგიერთ ეგზისტენციალურ რისკსაც, რომლებიც ბოლო თვეებში ხშირად ხვდებოდა სათაურებში.

კომპანიამ S-1 დოკუმენტში დაწერა: „ჩვენს ორგანიზაციაშიც და სხვა მკვლევრების, მარეგულირებლების, პოლიტიკის განმსაზღვრელებისა და ინდუსტრიის მონაწილეების მხრიდანაც გამოითქვა შეშფოთება, რომ საკმარისად მოწინავე ხელოვნური ინტელექტის სისტემებმა, სათანადო დამცავი ზომების, ზედამხედველობისა და უსაფრთხოების გარეშე შემუშავების, დანერგვისა და მართვის შემთხვევაში, შესაძლოა კაცობრიობას კატასტროფული ან ეგზისტენციალური საფრთხე შეუქმნას. ეს განსაკუთრებით მოსალოდნელია, თუ ასეთ სისტემებს ბოროტად გამოიყენებენ, გაამრავლებენ, იარაღად აქცევენ ან მაღალი ავტონომიურობით მოქმედების საშუალებას მისცემენ“.

შვიდივე თანადამფუძნებელი პირობას დებს, რომ Anthropic-ში საკუთარი წილის 80%-ს საქველმოქმედო მიზნებს მოახმარს.

თემებიჯეიკობ კოქსონიAmazonAnthropicGoogleMicrosoftNasdaqClaude

გამოქვეყნდა 26 ოქტომბერი, 2026