Apollo-ს შეფასებით, ტექნოლოგიური სექტორის გარეთ ხელოვნურ ინტელექტს სარგებელი არ მოუტანია

მსოფლიოს ერთ-ერთი უმსხვილესი საინვესტიციო კომპანია აცხადებს, რომ ხელოვნური ინტელექტის სარგებელს მხოლოდ ტექნოლოგიური კომპანიები იღებენ.

Apollo Global Management-მა შაბათს გამოქვეყნებულ ეკონომიკურ ანალიზში აღნიშნა, რომ ტექნოლოგიური კომპანიების ჯგუფი, რომელსაც „დიდებულ შვიდეულს“ უწოდებენ და რომელშიც Nvidia და Meta შედიან, ხელოვნური ინტელექტის ბუმის დროს შემოსავლებს ზრდის. თუმცა ეს ზრდა სხვა დარგებს არ შეხებია.

Apollo-ს პარტნიორმა და მთავარმა ეკონომისტმა ტორსტენ სლოკმა ანგარიშში დაწერა: „ამერიკის ტრადიციული კომპანიები უკან იხევენ და ხელოვნურ ინტელექტზე დანახარჯებს ზრდის წყაროდ კი არა, ხარჯების მუხლად აღიქვამენ, რომელიც მოგების მარჟას ამცირებს. ტექნოლოგიამ ტექნოლოგიური სექტორის გარეთ ამერიკულ კომპანიებს ფინანსური სარგებელი საერთოდ არ მოუტანა“.

სლოკმა რამდენიმე გრაფიკში სამი ძირითადი მაჩვენებელი შეაფასა: ერთ თანამშრომელზე შემოსავალი, მოგების მარჟა და პროდუქტიულობის ზრდა. ეს მაჩვენებლები ტექნოლოგიურ კომპანიებში მკვეთრად გაიზარდა, სხვა კომპანიებში კი არა.

2022 წლიდან ტექნოლოგიურ კომპანიებში ერთ თანამშრომელზე შემოსავალი მკვეთრად გაიზარდა: 550 000 დოლარიდან დღეს თითქმის 800 000 დოლარამდე. S&P 500-ის დანარჩენ კომპანიებში ეს მაჩვენებელი დიდად არ შეცვლილა და ბოლო შვიდი წლის განმავლობაში დაახლოებით 550 000 დოლარის ფარგლებში დარჩა.

ანალოგიურად, 2022 წლიდან ტექნოლოგიური კომპანიების მოგების მარჟა მკვეთრად გაიზარდა, სხვა კომპანიებში კი დაახლოებით 10%-ზე გაჩერდა.

მთელ ეკონომიკაში ხელოვნურ ინტელექტს პროდუქტიულობის ზრდა ჯერ მკვეთრად არ აუჩქარებია, როგორც ამას ხელოვნური ინტელექტის ზოგი ოპტიმისტი წინასწარმეტყველებდა.

Apollo-ს კვლევა აშშ-ის ეკონომიკას არასახარბიელო სურათს უქმნის. ამ ეკონომიკაში უზარმაზარ თანხებს ხარჯავენ ხელოვნური ინტელექტის ინსტრუმენტებსა და კომპანიებზე. მათი ხელმძღვანელები კი გვპირდებიან, რომ მალე დაიწყება „სიუხვის ხანა“, როცა ადამიანებს ამდენი მუშაობა აღარ მოუწევთ.

სლოკმა თქვა: „მომავლისთვის მთავარი კითხვაა, შეძლებენ თუ არა ამერიკის ტრადიციული კომპანიები, სულ უფრო იაფი ინტელექტი შემოსავლებისა და მოგების მარჟის უფრო სწრაფ ზრდად აქციონ, მაშინაც კი, როცა მოდელები სტანდარტულ პროდუქტად იქცევა“.

„ეს შეიძლება იმაზე რთული იყოს, ვიდრე ერთი შეხედვით ჩანს“, დასძინა მან.