არტეტა საკას „მოტყუების“ ბრალდებებს პასუხობს: „მოსაზრებებისთვის ღია ვართ“

სუნესმა ეს განცხადებები პირს მორგანის გადაცემაში, „ფეხბურთი ცენზურის გარეშე“, გააკეთა. მან საკას ფეხბურთელად აღწერა, რომელიც სიმულაციას მიმართავს და „ფეხზე უნდა დარჩეს“.

ლივერპულის ყოფილმა კაპიტანმა მორგანს უთხრა: „შენი ბიჭი საკა ყველგან ვარდება. არ მინდა მისი მოსმენა… ჩემი აზრით, ვინც ჯარიმას სიმულაციით ცდილობს, მატყუარაა“.

შოტლანდიელმა განაგრძო: „როგორც კი ჩანს, რომ [საკა] ბურთს კარგავს, ძირს ეცემა. სიმულაციას მიმართავს… ვარდება მაშინ, როცა ფეხზე უნდა დარჩეს“.

შემდეგ სუნესმა თქვა, რომ საკა ორთაბრძოლისას „ვარდნისას ყვირის“, რათა მსაჯი დაარწმუნოს, რომ მასზე იუხეშეს. „მსაჯი ფიქრობს, რომ იქ არაფერი მომხდარა, მაგრამ მერე ხედავს, რომ ის არ დგება“, თქვა ლივერპულის ყოფილმა ფეხბურთელმა.

შემდეგ შოტლანდიელი არსენალის მთლიან გუნდს შეეხო და გააკრიტიკა ფეხბურთელები, რომლებიც ასეთ მომენტებში საკას გარს ეხვევიან.

„ამაზე უარესი კი ისაა, რომ ახლომახლო ყველა, არსენალის ყველა ფეხბურთელი, ხელებს მაღლა სწევს და ჯარიმას ითხოვს. [ამის გამო] მსაჯი იბნევა.

„ის სასტვენს მაშინ აძლევს, როცა ჯარიმა არ ყოფილა. თავდაპირველად სწორად შეაფასა მომენტი. ჯარიმას ნიშნავს, რადგან ფიქრობს: „მოიცა, რაღაცას ვერ ვხვდები““.

სუნესმა მკაფიოდ თქვა, რომ „სიმულაცია მოტყუების ფორმაა“, თუმცა აღიარა, რომ ასეთ საქციელს ბევრი ფეხბურთელი მიმართავს და არა მხოლოდ საკა.

„ასი ადამიანი რომ გკითხოთ, თანამედროვე ფეხბურთში რა არ მოგწონთ, 50 პროცენტი სიმულაციას დაასახელებს, კიდევ 50 პროცენტი კი ვიდეოგამეორების სისტემას“, დაასკვნა შოტლანდიელმა.

არტეტამ კი სუნესის სიტყვებს მატჩისწინა პრესკონფერენციაზე მშვიდად უპასუხა: „ეს არ მომისმენია და მოსაზრებებზე საუბარს არ ვაპირებ“.

როცა მას სთხოვეს, მეტი ეთქვა და, შესაძლოა, სუნესის ბრალდებები უფრო კონკრეტულად გაეკრიტიკებინა, არსენალის მწვრთნელმა ამაზე უარი თქვა.

„მოსაზრებებისთვის ღია ვართ“, თქვა ესპანელმა. „ეს ჩვენი საქმის ნაწილია, ჩვენი როლის ნაწილია და ამ მოსაზრებებს პატივი უნდა ვცეთ, განსაკუთრებით მაშინ, თუ მათ პატივისცემით გამოთქვამენ.

„აქ ვართ, რათა დავამტკიცოთ, რომ ამ დონესა და ამ სცენას ვეკუთვნით. ყოველთვის გვაქვს გაუმჯობესებისა და უკეთ თამაშის სურვილი და ამბიცია. სულ ეს არის“, დაასრულა არტეტამ.

ოთხშაბათს საღამოს არსენალი მიუნხენში, „ალიანც არენაზე“, ბაიერნს დაუპირისპირდება. მოსალოდნელია, რომ საკაც ითამაშებს. გასულ კვირას ჩემპიონთა ლიგაზე სათადარიგოთა სკამიდან შესულმა საკამ ორი საგოლე მოქმედება შეასრულა.