აშშ Africell-ს 100 მილიონ დოლარს ასესხებს

დონალდ ტრამპის ადმინისტრაცია აშშ-ის საკუთრებაში არსებულ აფრიკულ სატელეკომუნიკაციო კომპანია Africell-ს 100 მილიონ დოლარს ასესხებს. ვაშინგტონი ამ ნაბიჯით რეგიონში ჩინური კომპანიების ჩანაცვლებას ცდილობს, რადგან ორ ზესახელმწიფოს შორის კონკურენცია მძაფრდება.

კომპანია ანგოლაში, კონგოს დემოკრატიულ რესპუბლიკაში, გამბიასა და სიერა-ლეონეში მუშაობს. როიტერსის ცნობით, Africell-თან შეთანხმება „ამერიკელ და მოკავშირე მომწოდებლებს“ ჩინური Huawei-ს საპირწონედ ინფრასტრუქტურის განვითარებაში დაეხმარება. Africell-მა Semafor-ს განუცხადა, რომ სესხი კომპანიას ანგოლაში „ამბიციური გაფართოების გაგრძელების“ შესაძლებლობას მისცემს.

პეკინი და ვაშინგტონი აფრიკის სამთო მრეწველობაში უპირატესობის მოსაპოვებლადაც იბრძვიან. აშშ-მა ამ კვირაში კენიაში კრიტიკული მინერალების გადამამუშავებელი მსხვილი საწარმოს განვითარების გეგმა გამოაცხადა. ვარაუდობენ, რომ კენიაში ათეულობით მილიარდი დოლარის ღირებულების იშვიათმიწა ელემენტებია, რომელთა ინდუსტრიას ჩინეთი მტკიცედ აკონტროლებს. გავრცელებული ცნობებით, კენიას განახლებადი ენერგიისა და ციფრული ტექნოლოგიების ინფრასტრუქტურისთვის საჭირო მინერალების დიდი, აუთვისებელი საბადოები აქვს. მათ შორისაა სპილენძი, გრაფიტი, ლითიუმი და ნიკელი. შეთანხმება პრეზიდენტ უილიამ რუტოს პოზიციებს აძლიერებს. რუტომ დასავლელ ლიდერებთან კავშირები განამტკიცა და რესურსების ადგილობრივად გადამუშავება მომავალი წლის არჩევნებში მეორე ვადისთვის ბრძოლის ერთ-ერთ მთავარ დაპირებად აქცია.