აშშ-ის გაზეთებმა Brave Software-ს საავტორო უფლებების დარღვევისთვის უჩივლეს

აშშ-ის რამდენიმე ყოველდღიურმა გაზეთმა, მათ შორის „ნიუ-იორკ ტაიმსმა“ და „ნიუ-იორკ დეილი ნიუსმა“, ორშაბათს მანჰეტენის ფედერალურ სასამართლოში ტექნოლოგიურ კომპანია Brave Software-ს უჩივლა. სააგენტო როიტერსის ცნობით, კომპანიას ედავებიან, რომ გაზეთების სტატიები ხელოვნური ინტელექტის მოდელების გასაწვრთნელად უნებართვოდ გამოიყენა. ასევე, მისი ვებბრაუზერის მომხმარებლებს ფასიანი მასალის ბარიერების უკანონოდ გვერდის ავლის საშუალება მისცა.

ნიუ-იორკის სამხრეთ ოლქის აშშ-ის რაიონულ სასამართლოში შეტანილი სარჩელების თანახმად, პროგრამული უზრუნველყოფის კომპანია ხელოვნური ინტელექტის ისეთ კომპანიებს, როგორებიცაა Anthropic, Perplexity და xAI, ფასიანი წვდომით აწვდიდა „Brave-ის ინდექსში არსებულ რეალურ დროში განახლებულ ონლაინმასალებს“. შემდეგ ეს კომპანიები ინდექსს მოდელების გასაწვრთნელად იყენებენ ან კონკრეტული მომხმარებლის შეკითხვებზე პასუხის გასაცემად მასალებს ეძებენ. თუმცა, ამ საქმეში ისინი მოპასუხეებად არ არიან დასახელებული.

სარჩელში ნათქვამია: „Brave-ს მედიასაშუალებებისთვის არასოდეს უთხოვია ნებართვა მათ ვებსაიტებზე შესასვლელად, მით უმეტეს, მათი მასალების გადასაწერად და მომხმარებლებისთვის ან სხვა ხელოვნური ინტელექტის კომპანიებისთვის მისაწოდებლად. პირიქით, როგორც უკვე აღინიშნა, Brave მომხმარებლებს მედიასაშუალებების თანხმობის გარეშე ფასიანი მასალის ბარიერების გვერდის ავლის საშუალებას აძლევს. კომპანიამ სხვა ზომებიც მიიღო, რის გამოც მედიასაშუალებებს არ შეუძლიათ, Brave-ს საკუთარ ვებსაიტებზე წვდომა აუკრძალონ. Brave-ს მედიასაშუალებებისთვის საავტორო უფლებებით დაცული მასალების უკანონო გამოყენების, გამრავლებისა და გავრცელებისთვის არასოდეს აუნაზღაურებია ზარალი“.

ტექნოლოგიური გამოცემა ვერჯის ცნობით, Brave ბრაუზერის ფუნქციით, რომელიც „გადახდის ბარიერის დამბლოკველად“ არის წარმოდგენილი, „ასობით წამყვან მედიასაშუალებაზე“ წვდომას უწევს რეკლამას.

„ჩვენ ხელოვნური ინტელექტის ეთიკურ და პასუხისმგებლიან გამოყენებასა და განვითარებას ვუჭერთ მხარს, მაგრამ Brave-მა მოქმედი საავტორო უფლებების კანონი უგულებელყო და „ტაიმსის“ არაერთი მოთხოვნა, შეეწყვიტა უფლებების დამრღვევი ქმედებები, უგულებელყო“, განუცხადა „ნიუ-იორკ ტაიმსის“ წარმომადგენელმა როიტერსს.

2023 წლის ბოლოს „ნიუ-იორკ ტაიმსმა“ ხელოვნური ინტელექტის გასაწვრთნელად ტექსტების უნებართვო გამოყენების გამო OpenAI-სა და Microsoft-საც უჩივლა. ეს საქმეები შესაძლოა მნიშვნელოვან პრეცედენტად იქცეს. დავის მთავარი საკითხია, გამოიყენეს თუ არა OpenAI-მ და Microsoft-მა საავტორო უფლებებით დაცული საგაზეთო სტატიები ChatGPT-ისა და Copilot-ის მოდელების გასაწვრთნელად, ამის ნებართვის გარეშე.