აშშ-ის თავდაცვის უწყებამ ფრენისას დრონების დამუხტვა შეუკვეთა

სადავო კონტროლის ტერიტორიებზე მუშაობის გასახანგრძლივებლად დრონებს ბატარეის გამოსაცვლელად დაშვება აღარ დასჭირდებათ. ამის ნაცვლად, ბატარეები ჰაერში ლაზერული სინათლით ენერგიის გადაცემის შედეგად დაიმუხტება. დრონი დავალების შესრულებას ბატარეის მუხტის წინასწარ განსაზღვრულ ზღვრამდე გააგრძელებს. შემდეგ ის ბატარეების დასამუხტად ARC სისტემას ავტომატურად დაუკავშირდება. შედეგად, ოპერატორებს ბატარეების გამოსაცვლელად თავშესაფრის დატოვება აღარ მოუწევთ.

სისტემის ინტეგრაცია მეორე და უფრო მაღალი ჯგუფის დრონებში იქნება შესაძლებელი. ესაა უპილოტო საფრენი აპარატები, რომელთა საფრენი წონა 9-დან 25 კილოგრამამდეა. ისინი მიწის ზედაპირიდან 1066 მეტრამდე სიმაღლეზე და 463 კმ/სთ-ზე ნაკლები სიჩქარით დაფრინავენ. ამ დრონებს უკვე შეუძლიათ სენსორული ტექნიკის მსგავსი სასარგებლო ტვირთის გადატანა. თავდაპირველად ARC-ის მიმღებს Kraus Hamdani Aerospace-ის K1000ULE-ში დაამონტაჟებენ. ეს სრულად ელექტრული, ზეშორი ფრენის მეორე ჯგუფის დრონია. მისი გამოყენება ფიქსირებული ფრთით 24 საათამდე, ხოლო ელექტრული ვერტიკალური აფრენისა და დაშვების რეჟიმში 12 საათამდეა შესაძლებელი. დრონი დაზვერვას, მეთვალყურეობასა და საკომუნიკაციო არხების გაფართოებას ემსახურება.

PowerLight-ის საინჟინრო და საცდელი ჯგუფი განვითარებას, ინტეგრაციასა და გამოცდებს სამხრეთ კაროლინის შტატში, შოუს საჰაერო ძალების ბაზაზე ჩაატარებს. PowerLight Technologies-ის ცნობით, ჯგუფს აშშ-ის ცენტრალური საჰაერო ძალების (AFCENT) ოპერატორები და ოპერაციების დამგეგმავები დაეხმარებიან. მათი მიზანი ტექნოლოგიის ოპერატიულ გამოყენებაში დანერგვაა.

PowerLight ლაზერის მეშვეობით ენერგიის უსადენო გადაცემასთან ერთად ოპტიკური ბოჭკოთი ენერგიის გადაცემაზეც მუშაობს. კომპანიის ენერგიის გადაცემის სისტემების გამოყენება ჰაერში, კოსმოსში, ხმელეთზე, ზღვასა და წყალქვეშაა შესაძლებელი.