აშშ უკრაინის Starshield-ზე შეზღუდვების შესახებ ურთიერთგამომრიცხავ ცნობებს ავრცელებს

გასული კვირის განმავლობაში ტრამპი ჟურნალისტებს არაერთხელ ეუბნებოდა, რომ უკრაინის სამხედროების მიერ გამოყენებულ სატელიტურ საკომუნიკაციო სისტემაზე შეზღუდვები მას არ დაუწესებია. შეზღუდვების გამო უკრაინული დრონები სიჩქარეს კარგავდნენ.

მანამდე პრეზიდენტს ეჭვი ჰქონდა, რომ შეფერხება მასკისგან მოდიოდა. მასკი ადრე ტრამპის ახლო მრჩეველი და ხშირი თანამგზავრი იყო.

ტრამპმა პარასკევს განაცხადა: „არ ვიცი, ეს ვინმემ გააკეთა თუ არა, მაგრამ მე არ გამიკეთებია და არც მგონია, რომ ეს ილონმა გააკეთა. რაც ვიცი, ყველაფერი ისევ ისეა, როგორც ყოველთვის იყო“.

ხუთშაბათს ტრამპმა, როგორც ჩანს, დაადასტურა, რომ სერვისი გათიშული იყო. მან თქვა, რომ ის კვლავ ოპტიმალური სიჩქარით მუშაობდა. უოლ სტრიტ ჯორნალის ცნობით, მასკი შეზღუდვების მოხსნას დათანხმდა. როდესაც ტრამპს ჰკითხეს, თავად სთხოვა თუ არა მასკს სიჩქარის ზღვრის მოხსნა, მან პასუხს თავი აარიდა.

ტრამპმა ჟურნალისტებს უთხრა: „იცით, მნიშვნელობა არ აქვს, მე დავრეკე თუ სხვამ. მთავარი ის არის, რომ მან შეზღუდვა მოხსნა“.

ხუთშაბათს, ცინცინატიში, ვენსს ჰკითხეს, მონაწილეობდა თუ არა მასკი უკრაინაში Starlink-ისა და Starshield-ის მუშაობის შენელებაში და საჭირო იყო თუ არა ამის გამოძიება.

ვენსმა ჟურნალისტებს განუცხადა: „ჩემი აზრით, ილონ მასკი კერძო კორპორაციას მართავს. სრულიად გასაგებია, რომ მას არ სურს ორ სახელმწიფოს შორის ომში ჩარევა, თუ აშშ-ის მთავრობა მკაფიოდ არ მიუთითებს, რა უნდა გააკეთოს“.

ვენსმა დასძინა: „ამიტომ, ვფიქრობ, საკითხი ილონს არ ეხება. მთავარი ის არის, როგორი იქნება ამერიკის პოლიტიკა უკრაინასა და რუსეთთან მიმართებით“.

რუბიო ამტკიცებდა, რომ ტრამპის ადმინისტრაციას და, უფრო ფართოდ, აშშ-ის მთავრობას უკრაინისთვის მნიშვნელოვანი სატელიტური მონაცემების მიწოდების შეფერხებასთან კავშირი არ ჰქონდა.

ოთხშაბათს ინდოეთში ჟურნალისტებთან საუბრისას რუბიომ ოთხ დღეში მესამედ განაცხადა, რომ უკრაინის ქსელზე წვდომის შეზღუდვა ტრამპს ან მისი ადმინისტრაციის სხვა წარმომადგენელს არ დაუვალებია. თუმცა, მისი თქმით, სისტემის მფლობელი მასკი შესაძლოა ამ საქმეში მონაწილეობდა.

რუბიომ თქვა: „დანამდვილებით შემიძლია გითხრათ, რომ აშშ-ის პრეზიდენტს და ჩვენს სისტემაში არავის მოუთხოვია, ამ სისტემაში რაიმე ცვლილება შეეტანათ. ეს არაერთხელ გვითქვამს. პრეზიდენტს არაფერი ესაქმება Starlink-ისა და Starshield-ის, ასევე ბატონი მასკის გადაწყვეტილებებთან. ეს კერძო კომპანიაა. პრეზიდენტი მას არ მართავს და ვერ დაავალებს, რამე გააკეთოს“.

ჰეგსეთმა გაიმეორა რუბიოს ნათქვამი. სამშაბათს მან უარყო, რომ სატელიტური ინტერნეტსერვისის შენელებაში აშშ მონაწილეობდა, და პასუხისმგებლობა მასკის კომპანიას გადააბარა.

ჰეგსეთმა ჟურნალისტებს უთხრა: „ჩვენ არაფერი შეგვიზღუდავს“. მან დასძინა, რომ „მომსახურების პირობები უნდა შესრულდეს“.

ჰეგსეთს არ განუმარტავს, მომსახურების რომელი პირობები უნდა დაეცვა უკრაინას. თუმცა, მისი თქმით, „Starlink-ს ასეთი გადაწყვეტილებების მიღების უფლება აქვს“.

გასულ კვირას მასკმა, რომელიც მსოფლიოში უმდიდრესი ადამიანია და Starlink-ისა და Starshield-ის შემქმნელ კომპანიას ხელმძღვანელობს, პასუხისმგებლობა ტრამპის ადმინისტრაციას დააკისრა.

მასკმა 14 ოქტომბერს X-ზე დაწერა: „Starshield-ის სისტემები აშშ-ის მთავრობას ეკუთვნის და მის მიერ კონტროლდება. სიჩქარის ან გამოყენების ნებისმიერი შეზღუდვის შესახებ გადაწყვეტილებას აშშ-ის სამხედროები იღებენ და საბოლოოდ პრეზიდენტი“.

მასკმა დასძინა: „Starlink კომერციული სერვისია, რომელსაც SpaceX ფლობს და აკონტროლებს. მისი გამოყენება სამოქალაქო ან თავდაცვითი საქმიანობით შემოიფარგლება და შეტევითი სამხედრო მოქმედებებისთვის არ შეიძლება, რადგან ეს კომერციული კომპანიისთვის შეუფერებელი იქნებოდა“.

ომის დროს ქვეყნის პრეზიდენტი გასულ კვირას მოულოდნელად დაწესებული შეზღუდვების გაუქმებას ცდილობდა.

სისტემების მუშაობის შეფერხებიდან მალევე, ვოლოდიმირ ზელენსკიმ განაცხადა, რომ ევროკავშირის ქვეყნებში მსგავსი შეზღუდვები არ მოქმედებდა და ისინი მხოლოდ უკრაინას შეეხო. მისი თქმით, „სხვა სიტყვებით, ეს დაგეგმილი ოპერაციაა“.

ორშაბათს ზელენსკი აშშ-ის კონგრესმენთა ორივე პარტიის წარმომადგენლებს ესაუბრა. სოციალურ ქსელში გამოქვეყნებულ ვიდეოში მან განაცხადა: „ფრონტის სხვადასხვა მონაკვეთზე Starlink-ისა და Starshield-ის სერვისებზე სიჩქარის შეზღუდვა კვლავ მოქმედებს და ამის შესახებ განმარტება ჯერ არ მიგვიღია. მხოლოდ სხვადასხვა უცნაურ ამბებს ვისმენთ“.

ოთხშაბათს, გადაცემაში „ფოქსი და მეგობრები“ მიცემულ ინტერვიუში, ზელენსკიმ თქვა, რომ უკრაინაში Starlink-ის კავშირი კვლავ შეზღუდულია. მისი თქმით, რუბიომ უთხრა, რომ შენელების „მოხსნაზე“ იმუშავებდა.

თემებიდონალდ ტრამპიილონ მასკიმარკო რუბიოპიტ ჰეგსეთირიჩარდ ბლუმენტალიჯეი დი ვენსიSpaceXStarlinkStarshieldევროკავშირი

გამოქვეყნდა 23 ოქტომბერი, 2026