ბადურის იმპლანტი მაკულის დეგენერაციისას მხედველობას აღადგენს

კალიფორნიულმა კომპანია საიენს კორპორეიშენმა (Science Corporation) სისტემა იმ ფაქტის გათვალისწინებით შექმნა, რომ მაკულის დეგენერაცია ბადურის ყველა ნერვულ წრედს არ აზიანებს. იღუპება მხოლოდ ფოტორეცეპტორები, ანუ უჯრედები, რომლებიც სინათლეს ელექტრულ სიგნალად გარდაქმნიან. Prima-ს იმპლანტი ამ უჯრედების მოქმედებას იმეორებს. ის ვიზუალურ ინფორმაციას პირდაპირ თვალის ჯანმრთელ ნერვულ წრედებს, შემდეგ კი ტვინს გადასცემს. სან-ფრანცისკოში კალიფორნიის უნივერსიტეტის (University of California, San Francisco) ოფთალმოლოგმა და Prima-ს სამედიცინო დირექტორმა ფრენკ ბროუდიმ თქვა: „ინფორმაციის დასამუშავებლად და გადასაცემად სხეულის ყველა ბუნებრივ ფუნქციას ვიყენებთ“.

მინიატიურული, წინ მიმართული კამერით აღჭურვილი სათვალე რეალურ დროში აღბეჭდავს იმას, რასაც ადამიანი ხედავს. ვიდეოს გარჩევადობა დაახლოებით 5 მეგაპიქსელია, სიჩქარე კი წამში 30 კადრი, რაც ტელევიზიის მაჩვენებელს ჰგავს. დაუმუშავებელი ვიდეო ოპტიკურ-ბოჭკოვანი კაბელით დაკავშირებულ პროცესორს გადაეცემა.

მცირე ზომის ხელის პროცესორი შეიძლება მაგიდაზე დაიდოს ან ჯიბეში მოთავსდეს. ის ვიდეოს ინფრაწითელი სინათლის სიგნალებად გარდაქმნის და სათვალისკენ აბრუნებს. მოწყობილობას ფიზიკური ღილაკებიც აქვს, რომლითაც მომხმარებელი კონტრასტს, სიკაშკაშესა და გამოსახულების მასშტაბს არეგულირებს.

სათვალეზე დამონტაჟებული ლაზერული პროექტორი მომხმარებლისკენაა მიმართული. ის 880 ნანომეტრი სიგრძის, უხილავი, ახლო ინფრაწითელი სინათლის იმპულსებს პირდაპირ თვალში ასხივებს. სიგნალი გუგას გაივლის და თვალის უკანა ნაწილში მოთავსებულ ბადურის იმპლანტამდე აღწევს.

იმპლანტი 378 პიქსელისგან შედგება. თითოეულ პიქსელს ერთი ელექტროდი და ორი ფოტოელექტრული უჯრედი აქვს, რომლებიც ორ ფუნქციას ასრულებენ. ისინი სინათლეს ელექტრულ დენად გარდაქმნიან. შემდეგ ჯანმრთელი ბიპოლარული და განგლიური უჯრედები სიგნალს ტვინს გადასცემენ. ფოტოელექტრული უჯრედები ჩიპის ენერგიით მომარაგებისთვის მზის ელემენტების ფუნქციასაც ასრულებენ, რის გამოც ელემენტი საჭირო აღარ არის.