ბარსელონა პარი სენ-ჟერმენის ტიფოს ძალადობისა და სიძულვილის წახალისებაში ადანაშაულებს

ბარსელონამ პარი სენ-ჟერმენი უეფას უჩივლა მას შემდეგ, რაც სამშაბათის ჩემპიონთა ლიგის მატჩამდე ტიფო გამოიფინა. ბარსელონას თქმით, მასზე გამოსახული გზავნილი „სპორტში ძალადობასა და სიძულვილს აღვივებს“.

პარკ დე პრენსზე მატჩის დაწყებამდე პარი სენ-ჟერმენის ქომაგებმა ერთ-ერთი კარის უკან ბანერი გაშალეს. მასზე ნიღბიანი ფიგურა, რომელსაც პარი სენ-ჟერმენის მაისური ეცვა, ბარსელონას ემბლემას ბენზოხერხით ანადგურებდა.

გამოსახულების ქვემოთ ფრანგულად ეწერა: „ხოცვა-ჟლეტა პარიზული სტილით“.

მატჩის დროს სხვა ბანერებიც გამოფინეს, რომლებზეც აშკარად პროვოკაციული გზავნილები იყო. ბარსელონამ პარი სენ-ჟერმენის ქომაგების ქმედებები „მკაცრად“ დაგმო.

ბარსელონა საფრანგეთის დედაქალაქში 4:2 დამარცხდა. მანამდე გუნდს ჩემპიონთა ლიგის საწყის ორ მატჩში გამარჯვება ჰქონდა მოპოვებული.

ბარსელონამ ბი-ბი-სის განუცხადა: „კლუბი მკაცრად გმობს ტრიბუნაზე ტიფოს გამოფენისას მომხდარ ინციდენტებს, მათ შორის, სისხლით დაფარულ ბენზოხერხს, რომლითაც ბარსელონას გერბს ესხმოდნენ თავს.

„ეს გამოსახულებები ღრმად შემაშფოთებელი იყო და სპორტში ძალადობისა და სიძულვილის გამაღვივებელ გზავნილს გადმოსცემდა.

„ასეთ გამოსახულებებსა და ენას მიუღებლად მივიჩნევთ, რადგან ისინი ეწინააღმდეგება პატივისცემის, სამართლიანი თამაშისა და სპორტული ეთიკის ღირებულებებს, რომლებსაც ფეხბურთში უნდა იცავდნენ.

„გვჯერა, რომ ფეხბურთი ჯანსაღი მეტოქეობის, ურთიერთპატივისცემისა და თამაშისადმი სიყვარულის სივრცე უნდა იყოს და მასში სიძულვილისა და ძალადობის წამახალისებელი გზავნილები ადგილი არ უნდა ჰქონდეს“.

უეფას სადისციპლინო წესდების მე-16 მუხლის თანახმად, „ჟესტების, სიტყვების, საგნების ან ნებისმიერი სხვა საშუალების გამოყენება პროვოკაციული გზავნილის გადასაცემად, რომელიც სპორტულ ღონისძიებას არ შეეფერება“, შესაძლოა სადისციპლინო ზომებით დაისაჯოს. პირველი დარღვევისთვის ჯარიმა 10 000 ევროს (8 381 ფუნტის) ოდენობის შეიძლება იყოს.

ბი-ბი-სი კომენტარისთვის უეფასა და პარი სენ-ჟერმენს დაუკავშირდა.

პარი სენ-ჟერმენის ფეხბურთელ კვარაცხელიას გაწყვეტილი წინა ჯვარედინი იოგის გამო ოპერაცია ჩაუტარდება.