ბორთვიკმა ინგლისის ნაკრებში მუშაობაზე უარი მითხრა, ამბობს ედვარდსი

გამოცდილმა დაცვის მწვრთნელმა შონ ედვარდსმა თქვა, რომ ინგლისის მთავარმა მწვრთნელმა, სტივ ბორთვიკმა, უარი უთხრა მომავალი წლის რაგბის მსოფლიო თასზე ინგლისის ნაკრებთან მუშაობის შეთავაზებაზე.

ედვარდსმა, რომელიც 60 წლისაა, საფრანგეთის ნაკრებში თანამდებობა მიმდინარე წლის დასაწყისში დატოვა. ინგლისის ქალთა ნაკრებში მოკლევადიანი მუშაობის შემდეგ კი არგენტინის ნაკრებთან კონტრაქტი გააფორმა, რომელიც ტურნირის დასრულებამდე იმუშავებს.

ედვარდსმა Rugby Union Weekly-ს განუცხადა: „სტივს ტელეფონით კარგად ვესაუბრე“.

„სტივს ვუთხარი, რომ შეუძლია, გუნდის ეკიპირების ასისტენტად დამნიშნოს და იქ ვიქნები, სამუშაოდ მზად“.

„ის ძალიან გულწრფელი იყო ჩემთან და ამისთვის მადლობა გადავუხადე“.

„მითხრა, რომ კმაყოფილია თავისი სამწვრთნელო შტაბით და იმით, როგორ მიდის საქმეები. ეს გავითვალისწინე“.

ედვარდსი თამაშის ერთ-ერთი ყველაზე წარმატებული დაცვის მწვრთნელია. უელსის ნაკრებში მუშაობის 12 წლის განმავლობაში მან ექვსი ერის თასი სამჯერ მოიგო დიდი სლემით. შემდეგ კი საფრანგეთის ნაკრებს, რომელიც მსოფლიო რაგბიში ერთ-ერთ უძლიერესად აქცია, არხის მეორე მხარეს ექვსი ერის თასის სამი მოგება მოუტანა.

ედვარდსმა „უასპსში“ მუშაობისას ჩემპიონთა თასი ორჯერ და ინგლისის ჩემპიონატი ოთხჯერ მოიგო. თავდაპირველად ის დაცვის მწვრთნელი იყო, მოგვიანებით კი კლუბის მთავარი მწვრთნელი გახდა.

ედვარდსი სათამაშო კარიერისას „უიგანისა“ და დიდი ბრიტანეთის რაგბის ლიგის ნაკრების წარმატებული ვარსკვლავი იყო. მას დიდი ხანია ინგლისის კაცთა ნაკრებთან აკავშირებენ.

რაგბის კავშირმა 2006 და 2008 წლებში მას სამწვრთნელო სისტემაში ჩართვა შესთავაზა. აღმასრულებელმა დირექტორმა ბილ სუინიმ 2021 წელს ედვარდსთან არაფორმალური მოლაპარაკებებიც გამართა, თუმცა საფრანგეთთან მისი გადაბირებისთვის ბრძოლა არ ისურვა.

ბორთვიკის სამწვრთნელო შტაბის შემადგენლობა ავსტრალიაში 2027 წლის მსოფლიო თასისთვის უკვე განსაზღვრულია. დაცვაზე რიჩარდ უიგლსვორთი მუშაობს, რომელსაც ბაირონ მაკგიგანი და ჯო ელ-აბდი ეხმარებიან.

ინგლისის ნაკრებს ბოლო ორი წლის განმავლობაში შედეგები მონაცვლეობდა. თებერვალში შოტლანდიამ მისი 12 ტესტ-მატჩიანი მოგებათა სერია შეწყვიტა, რასაც ზედიზედ ხუთი მარცხი მოჰყვა.

ინგლისმა ბოლოს ფიჯისა და არგენტინის ნაკრებები დაამარცხა. ნოემბრის განმავლობაში, ყოველ მომდევნო უქმეებზე, ის ავსტრალიას, იაპონიასა და ახალ ზელანდიას შეხვდება, შემდეგ კი ერთა ჩემპიონატის პლეი-ოფში ითამაშებს.