ბრაზილიის ახალგაზრდულ მატჩში 51 წითელი ბარათი აჩვენეს

ბრაზილიაში 20-წლამდელთა ქაოსურ მატჩში მსოფლიო რეკორდული რაოდენობის, 51 წითელი ბარათი აჩვენეს.

მინას-ჟერაისის 20-წლამდელთა ჩემპიონატის ნახევარფინალის პირველი მატჩი უბერლანდიასა და მამორეს შორის ინციდენტებმა ჩაშალა. მოედნიდან 43 ფეხბურთელი და სამწვრთნელო შტაბის რვა წევრი გააძევეს.

წინა რეკორდი 36 წითელი ბარათი იყო. ეს 2011 წელს არგენტინის მეხუთე დივიზიონის მატჩში, კლუბ ატლეტიკო კლეიპოლესა და ვიქტორიანო არენასს შორის დაფიქსირდა.

ბრაზილიურმა გამოცემა ო ტემპომ (O Tempo) დაწერა, რომ პარკე დუ საბიას სტადიონზე მიყენებული მასშტაბური ზიანის გამო სამხედრო პოლიციის გამოძახება გახდა საჭირო.

მსაჯის ანგარიშის თანახმად, მეორე ტაიმში ჩხუბი მას შემდეგ დაიწყო, რაც მამორეს ფეხბურთელმა დავიმ მეტოქის სათადარიგოთა სკამთან მდგომებს დასცინა. ეს მოხდა მას შემდეგ, რაც მისი გუნდი ანგარიშით 3:1 დაწინაურდა და გოლს ზეიმობდა.

უბერლანდიას მეკარეების მწვრთნელი პაულუ სერჟიუ დიას დუშ სანტუში მოედანზე შევარდა, რათა დავის დაპირისპირებოდა. ამას ჩხუბი და შემდეგ ფეხბურთელების გაძევება მოჰყვა. მანამდე უკვე სამი ფეხბურთელი გააძევეს.

პოლიციის ანგარიშში ნახსენებია 14 ჩამტვრეული კარი, დაზიანებული საშხაპეები, ჩამსხვრეული ფანჯრები და დამტვრეული სათადარიგოთა სკამები, მაგიდები და სკამები.

მატჩი დაახლოებით 40 წუთით შეჩერდა, შემდეგ კი მსაჯმა ფერნანდუ პატრიკ დროგშიკ მოდესტუმ შეწყვიტა.

უბერლანდიამ მოგვიანებით დაადასტურა, რომ ნახევარფინალის საპასუხო მატჩზე უარს ამბობს, რადგან ყველა წითელი ბარათის გამო მამორეს მხოლოდ შვიდი ფეხბურთელი ჰყავს ხელმისაწვდომი.

კლუბმა ეს გადაწყვეტილება „სამართლიანი თამაშის ჟესტად“ შეაფასა. მამორე ფინალში გავა, უბერლანდია კი მესამე ადგილისთვის მატჩზე კონცენტრირდება.