British Airways-ი A380-ებში უდიდეს ბიზნესკლასის სალონს აწყობს

ავიაკომპანიამ ამ კვირაში უზარმაზარი თვითმფრინავების ინტერიერის მასშტაბური განახლება წარადგინა. პროექტი მოიცავს სალონს, რომელსაც კომპანია მსოფლიოში უდიდეს ბიზნესკლასის სალონად ასახელებს. ორსართულიანი თვითმფრინავის ზედა სართულზე 100-ზე მეტი ინდივიდუალური ადგილი განთავსდება.

აღმასრულებელმა დირექტორმა შონ დოილმა მედიაღონისძიებაზე, რომელსაც Business Insider-იც დაესწრო, განაცხადა: „ეს თვითმფრინავის გარდაქმნაში რომელიმე ავიაკომპანიის მიერ ოდესმე განხორციელებული უდიდესი ერთიანი ინვესტიციაა. სამუშაოები თვითმფრინავის თავიდან ბოლომდე ვრცელდება და ბორტზე მგზავრობის გამოცდილების ყველა ასპექტს ეხება“.

British Airways-ის ცნობით, განახლებისას თითოეულ თვითმფრინავში 35 000-ზე მეტ ცალკეულ ნაწილს დაამონტაჟებენ, მათ შორის ახალ სამზარეულოებსა და კიბეებს.

პანდემიის შემდეგ ბევრმა ავიაკომპანიამ A380-ზე უარი თქვა, თუმცა თვითმფრინავი British Airways-ის ფლოტში კვლავ მნიშვნელოვან როლს ასრულებს. ეროვნულ ავიაგადამზიდავს ასეთი 12 თვითმფრინავი ჰყავს. ამ მაჩვენებლით ის მხოლოდ Emirates-ს ჩამორჩება.

დოილმა თქვა: „თქვენ იხილავთ, როგორი იქნება British Airways-ის შორ მანძილზე საჰაერო მიმოსვლის მომავალი. ეს ასახავს ინვესტიციას, რომელსაც მაღალი კლასის მომსახურებაში ვახორციელებთ. A380 ჩვენი ერთ-ერთი მთავარი თვითმფრინავია, რომელიც ამ მიზნისადმი ერთგულებას წარმოაჩენს“.

Airbus-მა A380-ის წარმოება 2021 წელს შეწყვიტა, რადგან პანდემიისას ხარჯების შესამცირებლად ბევრმა ავიაგადამზიდავმა უზარმაზარი თვითმფრინავები მოხსნა ექსპლუატაციიდან.

თუმცა მისი უზარმაზარი ზომა დამატებითი შესაძლებლობებისა და მდიდრული პირველი კლასის ინდივიდუალური ადგილებისთვის საკმარის სივრცეს ქმნის.

მოსალოდნელია, რომ ამ ტიპის თვითმფრინავები ფრენას 2040 წლისთვის შეწყვეტენ. ამის მიუხედავად, British Airways-ი მილიონებს ხარჯავს A380-ების განახლებაზე, რათა ისინი მის ყველაზე მდიდრულ შეთავაზებად აქციოს.

მომხმარებელთა მომსახურების დირექტორმა კალუმ ლემინგმა 2024 წელს British Airways-ის პირველი კლასის ინდივიდუალური ადგილის წარდგენისას თქვა: „გარდაქმნის მთელი ამ პროცესის განმავლობაში ჩვენი მიზანია, British Airways-ი ახალ დონეზე ავიყვანოთ და ნამდვილად გამორჩეული გავხადოთ“.

აშშ-ის ავიაკომპანიების უმეტესობამ პირველი კლასი შეამცირა, ევროპული ავიაგადამზიდავები კი დამატებით ფუფუნებაში ინვესტიციებს ახორციელებენ.

British Airways-მა იმხანად განაცხადა, რომ განახლებული თვითმფრინავი 2026 წლის შუა პერიოდში უნდა წარედგინა. თარიღი გადაიდო და შესაძლოა, მომავალ წლამდე გადაიწიოს.