ჩინეთის ექსპორტისა და იმპორტის ზრდამ მოლოდინს გადააჭარბა

მონაცემებით, იმპორტი 31%-ით გაიზარდა, რაც ივნისის შემდეგ ყველაზე სწრაფი მატებაა. აგვისტოში ზრდამ 28,2% შეადგინა.

ექსპორტისა და იმპორტის ზრდამ როიტერსის გამოკითხვის პროგნოზებს, შესაბამისად, 25,5%-სა და 24,5%-ს გადააჭარბა.

Wind Information-ის მეშვეობით მოპოვებული საბაჟო მონაცემებით, სექტემბერში ჩინეთიდან აშშ-ში ექსპორტი თითქმის 39,6%-ით გაიზარდა. ზრდამ მთლიანი ექსპორტის მაჩვენებელს გადააჭარბა, ხოლო ყოველთვიურმა სავაჭრო პროფიციტმა 2025 წლის იანვრის შემდეგ უმაღლეს ნიშნულს მიაღწია.

სი-ენ-ბი-სის გამოთვლებით, რომლებიც ოფიციალურ მონაცემებს ეყრდნობა, ჩინეთის ინტეგრალური სქემების დაფების გლობალური ექსპორტის ღირებულება სექტემბერში წლიურად 136%-ით გაიზარდა. თუმცა ექსპორტირებული ერთეულების რაოდენობა მხოლოდ 1%-ით მოიმატა.

Wind Information-ის მონაცემებით, ჩინეთის ნედლი ნავთობის იმპორტის მოცულობა უკვე ზედიზედ მეექვსე თვეა, ორნიშნა მაჩვენებლით მცირდება. ამავე დროს, მისი ღირებულება მაისის შემდეგ პირველად გაიზარდა. წლის დასაწყისიდან ჩინეთის ნედლი ნავთობისა და ბუნებრივი აირის იმპორტი მოცულობით შემცირდა.

წლის დასაწყისში ჩინეთის ექსპორტიცა და იმპორტიც ბოლო ხუთი წლის განმავლობაში ყველაზე სწრაფი ტემპით გაიზარდა.

ექსპორტის ზრდას ხელი შეუწყო ჩინეთში წარმოებულ ნაწილებზე მოთხოვნის მატებამ. ეს ნაწილები ხელოვნური ინტელექტისთვის საჭირო მონაცემთა ცენტრების მუშაობას უზრუნველყოფს. ზრდას ასევე ხელი შეუწყო აშშ-სთან დაძაბულობის სტაბილიზაციამ. აშშ ჩინეთის უმსხვილესი სავაჭრო პარტნიორია, თუ ცალკეულ ქვეყნებს განვიხილავთ.

Guotai Junan International Holdings-ის კვლევების ხელმძღვანელმა და მთავარმა ეკონომისტმა ჰაო ჯოუმ წერილობით აღნიშნა: „შედეგად მიღებული 133,5 მილიარდი დოლარის სავაჭრო პროფიციტი ყოველთვიური რეკორდია. ეს ჩინეთის საგარეო სექტორის უწყვეტ სიძლიერეზე მიუთითებს, მიუხედავად შიდა მოთხოვნასთან დაკავშირებული მუდმივი შეშფოთებისა“.

ბოლო წლებში ჩინეთის მზარდი ექსპორტის ეკონომიკური გავლენა გლობალურად უფრო მკაცრი დაკვირვების საგანი გახდა. ეს სუსტი შიდა მოთხოვნის ფონზე მოხდა. იმპორტის ზრდას ხელოვნურ ინტელექტთან დაკავშირებულმა მოთხოვნამ და ძირითადი პროდუქტების ფასების თანმხლებმა მატებამაც შეუწყო ხელი.

გასულ თვეში აშშ-მ და ჩინეთმა გამოაცხადეს, რომ თითოეული ქვეყნიდან 30 მილიარდი დოლარის ღირებულების საქონელზე საბაჟო ტარიფებს შეამცირებენ. მათ ასევე უფრო ფართო სავაჭრო ზავის ორი თვით, იანვრამდე გაგრძელება დაგეგმეს.

ევროკავშირმა გასულ კვირას განაცხადა, რომ პეკინში მაღალი დონის სავაჭრო მოლაპარაკებების შემდეგ ჩინეთი ბლოკში ჰიბრიდული ავტომობილების ექსპორტის განახევრებას დათანხმდა.