ჩინეთმა Visa-ს საბანკო ბარათების ბიზნესის დაწყების ნება მისცა

ეს ინფორმაცია გავრცელდა მაშინ, როცა აშშ-ისა და ჩინეთის პრეზიდენტები წელს მესამე შეხვედრას გეგმავენ.

Visa-მ განაცხადა: „ეს მნიშვნელოვანი ეტაპია კომპანიისთვის ჩინეთის შიდა გადახდების ბაზრის მომსახურების გზაზე“.

Visa-ს აღმასრულებელმა დირექტორმა რაიან მაკინერნიმ განაცხადა: „Visa 40 წელზე მეტი ხნის განმავლობაში აქტიურად უწყობდა ხელს ჩინეთის დინამიკური გადახდების სფეროს განვითარებას. მოუთმენლად ველით, რომ ჩინეთის სახალხო ბანკის წესების შესაბამისად, საჭირო ნაბიჯებს გადავდგამთ და ჩინეთში მუშაობას დავიწყებთ“.

მაკინერნი მაისში პრეზიდენტ დონალდ ტრამპის ბიზნესდელეგაციასთან ერთად პეკინს ეწვია. ივნისში ის აშშ-ჩინეთის ბიზნესსაბჭოს (U.S.-China Business Council) თავმჯდომარე გახდა. Visa-ს აღმასრულებელი დირექტორი სექტემბრის დასაწყისში პეკინში ვიზიტსაც ხელმძღვანელობდა.

The Asia Group-ის პარტნიორმა და ციფრული მიმართულების ხელმძღვანელმა ჯორჯ ჩენმა თქვა: „დროის შერჩევა საყურადღებოა“.

ჩენმა დასძინა: „პეკინმა Visa-ს ლიცენზიის დამტკიცება შენჟენში მომდევნო თვეში დაგეგმილ APEC-ის ლიდერთა შეხვედრამდე გადაწყვიტა, სადაც სი ძინპინი და ტრამპი, სავარაუდოდ, კვლავ შეხვდებიან. ეს ნაბიჯი მიანიშნებს, რომ ტრამპის ჩინეთში მომდევნო ვიზიტამდე პეკინს ამერიკული ბიზნესისთვის ხელშესახები პროგრესის ჩვენება სურს“.

ტრამპმა მაისში პეკინში ვიზიტის შემდეგ Fox News-ს განუცხადა, რომ ჩინეთის ბაზარზე დაშვების შესახებ Visa-ს მოთხოვნა წამოჭრა. სექტემბრის სამიტის შემდეგ ჩინეთმა განაცხადა, რომ ქვეყანაში მუშაობის მსურველი ყველა უცხოური ფინანსური დაწესებულების განაცხადებს დაამტკიცებდა.

კონტინენტური ჩინეთი ფინანსურ სექტორს მკაცრად აკონტროლებს, ადგილობრივ კომპანიებს უპირატესობას ანიჭებს და კაპიტალის საზღვრებს შორის მოძრაობას ზღუდავს.

Visa-მ მანამდე განაცხადა, რომ საბანკო ბარათებით ანგარიშსწორების დაწესებულების საქმიანობის დასაწყებად ჩინეთის სახალხო ბანკს 2020 წლის მაისში მიმართა.

კომპანია ჩინურ ბანკებთან ორმაგი ბრენდის ბარათებზე მუშაობდა. ამ ბარათებით ჩინეთში განხორციელებულ ოპერაციებს ჩინეთის UnionPay ამუშავებს, ხოლო საზღვარგარეთ გადახდებს Visa. იანვარში Visa-მ განაცხადა, რომ კონტინენტურ ჩინეთში გაცემული ბარათების Apple Pay-სთან დაკავშირება საზღვარგარეთ გამოსაყენებლად შეიძლებოდა.

კონკურენტ Mastercard-ის ერთობლივმა საწარმომ ჩინეთში განაცხადა, რომ გადახდების დამუშავება 2024 წელს დაიწყო. მანამდე საწარმომ 2020 წლის თებერვალში ჩინეთის სახალხო ბანკისგან საბანკო ბარათებით ანგარიშსწორებისთვის მზადების ნებართვა მიიღო.