დიდ ბრიტანეთში ამერიკელი ჯარისკაცი რუსეთის სასარგებლოდ ჯაშუშობის ეჭვით დააკავეს

აშშ-ის არმიის მაღალი რანგის სამხედრო მოსამსახურე დიდ ბრიტანეთში რუსეთის სასარგებლოდ ჯაშუშობის ეჭვით დააკავეს, განაცხადა ლონდონის მეტროპოლიტენის პოლიციამ სამშაბათს საღამოს.

41 წლის მამაკაცი, რომლის ვინაობაც არ სახელდება, სამშაბათს გლოსტერის მახლობლად დააკავეს. ქალაქი ინგლისის დასავლეთ ნაწილში მდებარეობს. დაკავება გაერთიანებული სამეფოს კონტრტერორისტული პოლიციის გამოძიების ფარგლებში მოხდა. ბრიტანელი პოლიციელები გამოძიებისას აშშ-ის უწყებებთან, მათ შორის სამხედროებთან და გამოძიების ფედერალურ ბიუროსთან (FBI), თანამშრომლობდნენ.

ნატოს მაღალი რანგის სამხედრო ოფიციალურმა პირმა სამშაბათს დაადასტურა, რომ ამერიკელი სამხედრო ალიანსის მოკავშირეთა სწრაფი რეაგირების კორპუსში მსახურობდა.

კორპუსის შტაბი ინგლისის საგრაფო გლოსტერშირში მდებარეობს. ეს ნატოს სამვარსკვლავიანი შტაბია, სადაც 20-ზე მეტი ქვეყნის 400-ზე მეტი მუდმივი თანამშრომელი მსახურობს. ისინი მზად არიან, სახმელეთო ძალები საჭიროებისამებრ განათავსონ.

კრემლის პრესსპიკერმა დიმიტრი პესკოვმა ოთხშაბათს ჟურნალისტებს განუცხადა, რომ მოსკოვს დიდ ბრიტანეთში მიმდინარე საქმესთან „აბსოლუტურად არაფერი აკავშირებს“.

საქმის ცენტრალური ფიგურა, რომელიც ლონდონში დააკავეს, გაერთიანებული სამეფოს ეროვნული უსაფრთხოების კანონის პირველი და მესამე მუხლებით გათვალისწინებული დანაშაულების ჩადენაშია ეჭვმიტანილი.

პირველი მუხლი დაცული ინფორმაციის მოპოვებას ან გამჟღავნებას ეხება, მესამე კი უცხოური სადაზვერვო სამსახურის დახმარებას.

პირველი მუხლით გათვალისწინებული დანაშაულისთვის მაქსიმალური სასჯელი სამუდამო პატიმრობაა, ხოლო მესამე მუხლით გათვალისწინებული დანაშაულისთვის 14 წლით პატიმრობა. ორივე დანაშაულისთვის შესაძლოა ჯარიმაც დაწესდეს.

მეტროპოლიტენის პოლიციის ცნობით, პოლიციელები გლოსტერშირის ორ ადგილას ჩხრეკას ატარებენ.

დაკავება იმ დროს მოხდა, როცა ვაშინგტონი უკრაინაში რუსეთის ომის დასრულების შუამავლობას ცდილობს. რუსეთისა და უკრაინის ოფიციალურ პირებს შორის აშშ-ის შუამავლობით მოლაპარაკებები სამშაბათს აბუ-დაბიში დაიწყო. ეს თებერვლის შემდეგ პირველი ასეთი შეხვედრაა. კიევი და მისი ევროპელი მოკავშირეები ნებისმიერი შეთანხმების ფარგლებში სანდო უსაფრთხოების გარანტიების მოთხოვნას განაგრძობენ.

პრეზიდენტმა დონალდ ტრამპმა, რომელიც დიდი ხანია აკრიტიკებს ნატოსა და მისი წევრების თავდაცვის ხარჯებს, ორშაბათს განაცხადა, რომ ორივე მხარეს თითქმის ხუთწლიანი ომის დასრულების მზარდი სურვილი ეტყობოდა.

რუსეთი დიდი ხანია იმუქრება საპასუხო ზომებით ნატოს აღმოსავლეთ ფლანგის გაფართოების შემთხვევაში. მანამდე რუსეთი მოითხოვდა გარანტიებს, რომ უკრაინას ალიანსში გაწევრიანების უფლებას არასოდეს მისცემდნენ. ფინეთი და შვედეთი ნატოს უახლესი წევრები 2023 და 2024 წლებში გახდნენ, შესაბამისად.