ევროკავშირი ჩიპების დიზაინის პლატფორმაში 525 მილიონ ევროს აბანდებს

ევროკავშირი 525 მილიონ ევროს ჩადებს, რათა ევროპული ჩიპების დიზაინის კომპანიების ახალი თაობის განვითარებას შეუწყოს ხელი. ამის შესახებ ჰენა ვირკუნენმა, ევროკომისიის ვიცე-პრეზიდენტმა ტექნოლოგიური სუვერენიტეტის, უსაფრთხოებისა და დემოკრატიის საკითხებში და ციფრული და სასაზღვრო ტექნოლოგიების ევროკომისარმა, „ევროპული ჩიპების დიზაინის პლატფორმის“ (European Chip Design Platform) ამოქმედებისას განაცხადა.

ევროპული ჩიპების დიზაინის პლატფორმა ევროპული ქვეყნების მნიშვნელოვანი ინიციატივაა, რომელიც ევროკავშირის ჩიპების აქტის ფარგლებში ხორციელდება. მისი მიზანი მოწინავე ჩიპების ევროპული დიზაინის შესაძლებლობების შექმნა და გაძლიერებაა. პლატფორმა ევროკავშირს აშშ-სა და ჩინეთთან დაახლოებაში უნდა დაეხმაროს.

ევროკომისიის ცნობით, ევროპული ჩიპების დიზაინის კომპანიების წილი ჩიპების დიზაინის გლობალურ შემოსავალში ამჟამად 1%-ზე ნაკლებია. ჩიპების დიზაინი ნახევარგამტარების ინდუსტრიის ღირებულებათა ჯაჭვის მნიშვნელოვანი ნაწილია. ამ ინდუსტრიაზე მსოფლიოში ხელოვნურ ინტელექტზე მოთხოვნის ზრდა მოქმედებს.

პლატფორმის ამოქმედებისას ვირკუნენმა თქვა: „ვიცით, რომ ევროპა ნახევარგამტარების გლობალურ ინდუსტრიაში პოზიციის გაძლიერებას ვერ შეძლებს, თუ ჩიპების შემუშავებაში წარმატებას ვერ მიაღწევს“. მან დასძინა: „ცოცხალი დიზაინის ეკოსისტემის მხარდაჭერა, თავის მხრივ, წარმოების შესაძლებლობებზე მოთხოვნას გაზრდის და ევროპაში ღირებულებათა მთელ ჯაჭვს გააძლიერებს“.

ევროკომისიის პრესრელიზის თანახმად, „ევროპაში ახალი საწარმოო შესაძლებლობები მდგრადი მხოლოდ მაშინ იქნება, თუ შესაბამისი მოთხოვნა იარსებებს, ხოლო ამ მოთხოვნის დიდი ნაწილი ევროპული დიზაინის კომპანიებიდან უნდა მოდიოდეს“.

ევროკომისია და ევროკავშირის წევრი ქვეყნები ახალ ინიციატივას 440 მილიონი ევროს ოდენობის სახელმწიფო ინვესტიციით, გრანტების სახით დააფინანსებენ. ამას კიდევ 85 მილიონი ევრო დაემატება. თანხა ღრუბლოვან პლატფორმის ინფრასტრუქტურას, დამხმარე სერვისების მუშაობასა და ჩიპების დიზაინის ღია კოდის ხელსაწყოების შემუშავებას მოხმარდება.

ევროპული ჩიპების დიზაინის პლატფორმა კომპანიებს დიზაინის ხელსაწყოებზე, დამხმარე სერვისებზე, ინტელექტუალური საკუთრების უფლებებსა და საწარმოო შესაძლებლობებზე წვდომას მისცემს. სტარტაპებსა და კომპანიებს პლატფორმის საშუალებით დაფინანსების მოთხოვნა შეეძლებათ. მოწინავე სტარტაპები ჩიპების შემუშავების მაღალი ხარჯების დასაფარად 16 მილიონ ევრომდე გრანტს მიიღებენ.

2023 წელს მიღებული ევროკავშირის ჩიპების აქტი მიზნად ისახავს ევროკავშირის ნახევარგამტარების ეკოსისტემის გაძლიერებას, მიწოდების ჯაჭვების მდგრადობის უზრუნველყოფასა და გლობალურ საწარმოო სიმძლავრეში ევროკავშირის წილის გაზრდას. ჩიპების შემუშავებაში აშშ-სა და ჩინეთზე დამოკიდებულების შესამცირებლად ევროკავშირმა მილიარდობით ევროს ღირებულების სახელმწიფო დახმარების პროგრამა წამოიწყო. აქტის ერთ-ერთი მთავარი ნაწილია სწორედ ევროპული ჩიპების დიზაინის პლატფორმის შექმნა.