ევროკავშირი Starlink-ს უკრაინაში მომსახურების სრულად აღდგენას სთხოვს

ევროკავშირმა უკრაინაში Starlink-ის სატელიტური მომსახურების შეზღუდვის შესახებ მედიაში გავრცელებულ ცნობებს „უკიდურესად შემაშფოთებელი“ უწოდა და დამფუძნებელ ილონ მასკს კურსის დაუყოვნებლივ შეცვლისკენ მოუწოდა. მანამდე, მათ შორის, Wall Street Journal-მა გაავრცელა ინფორმაცია, რომ შეზღუდვაზე თავად მასკი იყო პასუხისმგებელი.

უკრაინის სამხედრო ძალები Starlink-სა და სამხედრო დანიშნულების Starshield-ს პარალელურად იყენებენ. უკრაინის ცნობით, გასულ კვირას მომსახურების ხარისხი საგრძნობლად გაუარესდა. როგორც ჩანს, შეზღუდვები ძირითადად იმ საფრენ აპარატებს შეეხო, რომლებიც საათში 160 კმ-ზე მეტი სიჩქარით გადაადგილდებიან. ამან უარყოფითად იმოქმედა დრონების გამოყენებით საბრძოლო მოქმედებების წარმართვაზე და რუსული თავდასხმების მოგერიება გაართულა.

მასკმა თავდაპირველად განაცხადა, რომ სამხედრო დანიშნულების Starshield-ს აშშ-ის სამხედრო ძალები და, საბოლოოდ, თეთრი სახლი აკონტროლებენ. მისი თქმით, Starlink-ს, როგორც კომერციულ მომსახურებას, მისი კომპანია SpaceX მართავს, თუმცა მისი გამოყენება მხოლოდ თავდაცვისთვის შეიძლება და არა სამხედრო თავდასხმებისთვის.

პრეზიდენტმა დონალდ ტრამპმა და აშშ-ის თავდაცვის მინისტრმა პიტ ჰეგსეთმა არაერთხელ უარყვეს ცნობები, რომ მომსახურების შეზღუდვაზე აშშ-ის მთავრობა იყო პასუხისმგებელი. ახლა აშშ-ის მედია, ამ საკითხთან დაახლოებულ პირებზე დაყრდნობით, წერს, რომ შეზღუდვის ბრძანება თავად მასკმა გასცა. მანამდე მას მოქმედებაზე თეთრ სახლთან შეუთანხმებია პოზიცია და თავად ტრამპსაც დალაპარაკებია.

აშშ-ის მთავრობა პასუხისმგებლობას კვლავ უარყოფს. აშშ-ის სახელმწიფო მდივანმა მარკო რუბიომ ოთხშაბათს კიდევ ერთხელ აღნიშნა, რომ მთავრობას მომსახურების შეზღუდვის მითითება არ გაუცია. SpaceX-სა და თავად მასკს მედიის შეკითხვებზე პასუხი არ გაუციათ.

ამ დროისთვის უკრაინაში Starlink-ის მომსახურება, სავარაუდოდ, ჯერ კიდევ სრულად აღდგენილი არ არის. ევროკომისიის წარმომადგენელმა ოთხშაბათს ბრიუსელში განაცხადა: „SpaceX-მა სასწრაფოდ უნდა აღადგინოს უკრაინისთვის მომსახურების სრული მოცულობა, რადგან უკრაინას ეს კრიტიკული კავშირები სჭირდება“.

ევროკომისიის თქმით, უკრაინის ომი აჩვენებს, რამდენად არის ევროპის უსაფრთხოება დამოკიდებული კოსმოსზე. ამიტომ ევროკავშირი, მათ შორის, აქტიურად მუშაობს ახალი სატელიტური ქსელის, IRIS2-ის, განვითარებასა და შექმნაზე. ქსელი 300-ზე მეტი თანამგზავრისგან შედგება და სამოქალაქო და სამხედრო მიზნებისთვის მაქსიმალურად უსაფრთხო სატელიტურ კავშირებს უზრუნველყოფს. „რა თქმა უნდა, უკრაინას ამ პროექტში სრულად ჩავრთავთ“, დასძინა წარმომადგენელმა.