გაერთიანებული სამეფო წყალქვეშა კაბელების დამაზიანებლებს 14 წლით პატიმრობით ემუქრება

გაერთიანებული სამეფო წყალქვეშა კაბელების დამაზიანებლებს 14 წლამდე პატიმრობითა და შეუზღუდავი ჯარიმებით ემუქრება. როგორც ჩანს, ხელისუფლებამ გადაწყვიტა, რომ ვიქტორიანული ეპოქის კანონები საკმარისი არ არის კრიტიკული ინფრასტრუქტურისგან რუსული წყალქვეშა ნავების შესაკავებლად.

ხუთშაბათს მთავრობამ წარადგინა გეგმები, რომ შეცვალოს 1885 წლით დათარიღებული კანონმდებლობა და გაამკაცროს სასჯელი წყალქვეშა კაბელებისა და ნავთობსადენების დაზიანებისთვის. ეს ინფრასტრუქტურა გაერთიანებული სამეფოს ინტერნეტისა და ენერგომომარაგების მუშაობას უზრუნველყოფს.

უაიტჰოლის ცნობით, წყალქვეშა კაბელებზე გაერთიანებული სამეფოს საერთაშორისო მონაცემთა მიმოცვლის დაახლოებით 99 პროცენტი მოდის, ხოლო წყალქვეშა მილსადენებით ქვეყნის გაზის მიწოდების 74 პროცენტი ხორციელდება. თუმცა ამ ინფრასტრუქტურის დიდი ნაწილი კანონებითაა დაცული, რომლებიც იმ დროს დაიწერა, როცა ტელეგრაფი უახლესი ტექნოლოგია იყო.

1885 წლის წყალქვეშა ტელეგრაფის აქტით, კაბელის დაზიანებისთვის დაუდევრობის გამო მაქსიმუმ 100 ფუნტი ჯარიმა იყო დაწესებული. ეს მაშინ შესაძლოა შემაკავებელი ყოფილიყო, მაგრამ ძნელად სავარაუდოა, რომ დღეს შესაძლო დამნაშავეებს შეაჩერებს.

გეგმის მიხედვით, კრიტიკული წყალქვეშა ენერგეტიკული ან სატელეკომუნიკაციო ინფრასტრუქტურის განზრახ დაზიანებისთვის 14 წლამდე პატიმრობა იქნება გათვალისწინებული. დაუფიქრებელი ან დაუდევარი დაზიანებისთვისაც დაწესდება უფრო მკაცრი სასჯელი, მათ შორის შეუზღუდავი ჯარიმები.

წყალქვეშა სატელეკომუნიკაციო ოპერატორებს უსაფრთხოების რისკების გამოვლენისა და მართვის ახალი სამართლებრივი ვალდებულებები დაეკისრებათ. მინისტრებს კი მიენიჭებათ უფლებამოსილება, საჭიროებისა და პროპორციულობის შემთხვევაში კომპანიებსა და კაბელების შემკეთებლებს ეროვნული უსაფრთხოების დასაცავად ზომების მიღება მოსთხოვონ.

მთავრობას ასევე სურს, დაარეგულიროს ოპტიკურ-ბოჭკოვანი სენსორული ტექნოლოგია. ის წყალქვეშა კაბელებით ზღვაში აქტივობას აფიქსირებს, მაგრამ უსაფრთხოების რისკად შეიძლება იქცეს, თუ სენსიტიური მონაცემები მტრულად განწყობილ მხარეებს ჩაუვარდებათ ხელში.

აპრილში ბრიტანეთის ძალებმა კრიტიკულ წყალქვეშა ინფრასტრუქტურასთან რუსეთის ფარული წყალქვეშა ოპერაცია გამოავლინეს. გავრცელებული ინფორმაციით, ოპერაციაში მონაწილეობდა თავდასხმის წყალქვეშა ნავი, რომელიც ყურადღების გადასატანად მოქმედებდა, და ორი სპეციალიზებული ხომალდი, რომლებიც გაერთიანებული სამეფოს კაბელების მარშრუტებს იკვლევდნენ.

სატელეკომუნიკაციო მინისტრმა იან მიურეიმ განაცხადა: „ჩვენ წინაშე არსებული საფრთხეები მკვეთრად შეიცვალა. კრიტიკულ წყალქვეშა ინფრასტრუქტურასთან რუსეთის საეჭვო აქტივობა შეინიშნება, თუმცა ამ სასიცოცხლოდ მნიშვნელოვანი კავშირების დამცავი ზოგი კანონი საუკუნეზე მეტი ხნისაა“.