გერმანია და საფრანგეთი ავტოინდუსტრიის გეგმაზე შეთანხმდნენ

ორივე მხარემ აღნიშნა: „სუფთა მობილობაზე გადასვლას საფრანგეთში, გერმანიასა და მთელ ევროპაში ინვესტიციები, ინოვაციები და წარმოება უნდა ახლდეს“. ამიტომ, ორი ქვეყანა ყოვლისმომცველ პაკეტს სთავაზობს.

ევროპის ორი უდიდესი ეკონომიკის მთავრობებმა განაცხადეს: „ჩვენი თანამშრომლების, ინდუსტრიისა და მოქალაქეების წინაშე ვალდებული ვართ, უზრუნველვყოთ, რომ ავტოინდუსტრიის გლობალურ გარდაქმნაში ევროპამ წამყვანი როლი შეასრულოს. ჩვენი მიზანი ნათელია: კონკურენტუნარიანი, ინოვაციური და დეკარბონიზებული ევროპული ავტოინდუსტრია, რომელიც ევროპაში აწარმოებს და მომავლის სამუშაო ადგილებს ქმნის“.

კანცლერმა ფრიდრიხ მერცმა პლატფორმა X-ზე დაწერა, რომ ეს ინდუსტრიისთვის საინვესტიციო სიგნალი და „მძღოლებისა და გერმანიაში, საფრანგეთსა და ევროპაში სამუშაო ადგილებისთვის“ კარგი დღეა.

საფრანგეთის პრეზიდენტმა ემანუელ მაკრონმა პლატფორმა X-ზე დაწერა: „ევროპა უნდა იყოს კონტინენტი, რომელიც ინოვაციებს ქმნის, ინვესტიციებს ახორციელებს და აწარმოებს. ამავდროულად, მან კლიმატი უნდა დაიცვას და ჩვენი სამუშაო ადგილები შეინარჩუნოს. ეს ჩვენი ვალდებულების არსია“.

ჰანდელსბლატმა (Handelsblatt) პოზიციის დოკუმენტის შესახებ პირველად ხუთშაბათს გაავრცელა ინფორმაცია. თუმცა, გერმანიის მთავრობის ცნობით, ხუთშაბათს საბოლოო შეთანხმება ჯერ მიღწეული არ იყო. ახლა მხარეები უკვე შეთანხმდნენ.

აქამდე საფრანგეთი შიდაწვის ძრავიანი ავტომობილების ეტაპობრივი აკრძალვის შერბილებას ეწინააღმდეგებოდა. შეთანხმებამ ევროკავშირის წევრი ქვეყნების საბჭოში უმრავლესობა შესაძლოა უზრუნველყოს.

ევროკომისიამ გასული წლის დეკემბერში ევროკავშირში შიდაწვის ძრავიანი ახალი ავტომობილების რეგისტრაციის 2035 წლის შემდეგაც დაშვება შესთავაზა. ეს მანამდე შეთანხმებული აკრძალვისგან გადახვევა იყო, რასაც გერმანია მხარს უჭერდა.

წინადადებებს ამჟამად ევროპარლამენტი და ევროკავშირის წევრი ქვეყნების საბჭო ცალ-ცალკე განიხილავენ. ორივე ინსტიტუტის თანხმობის გარეშე ისინი ძალაში ვერ შევა. საფრანგეთი და ევროკავშირის კიდევ ექვსი ქვეყანა ივნისშიც შერბილებას ეწინააღმდეგებოდნენ და სტრატეგიული შეცდომის შესახებ აფრთხილებდნენ.