Google-მა ონლაინშოპინგისთვის „უნივერსალური კალათა“ გამოუშვა

როგორც სახელწოდება მიანიშნებს, ეს „უნივერსალური“ ციფრული კალათაა. მომხმარებელს სხვადასხვა საცალო მოვაჭრის პროდუქტების ერთ სივრცეში შენახვა შეუძლია. კალათა Google-ის სხვადასხვა პლატფორმაზე მუშაობს. ეს ნიშნავს, რომ Gemini აპისა და Google Search-ის ხელოვნური ინტელექტის რეჟიმით მოძიებული და დამატებული პროდუქტები ერთ კალათაში შეინახება. Google უნივერსალური კალათის Gmail-სა და YouTube-თან ინტეგრაციასაც გეგმავს, თუმცა ვადები ჯერ არ გამოუცხადებია.

Google მომხმარებელს კალათაში შენახული პროდუქტების გაიაფებისა და მარაგში დაბრუნების შესახებ შეტყობინებებს გაუგზავნის. ამიტომ თითოეული საცალო მოვაჭრის ვებსაიტის ცალ-ცალკე შემოწმება საჭირო აღარ იქნება. ხელსაწყო შენახულ პროდუქტებთან ერთად მის მიერ ნაპოვნ შესაბამის ფასდაკლების კოდებსაც აჩვენებს. მომხმარებელს კალათიდან პროდუქტების საფასურის Google Wallet-ით გადახდა შეეძლება. მას ასევე შეუძლია, პროდუქტები მოვაჭრის კალათაში გადაიტანოს და შესყიდვა უშუალოდ მის ვებსაიტზე დაასრულოს. უნივერსალურ კალათას Google Wallet-თან ერთად მომხმარებლის შენახული საკრედიტო ბარათების უპირატესობების გაანალიზებაც შეუძლია. შესყიდვისას ის მომხმარებელს საუკეთესო გადახდის მეთოდის შერჩევაში დაეხმარება.

გამოშვება ხელოვნური ინტელექტით მხარდაჭერილი შოპინგის სფეროში კონკურენციის გამწვავებას ემთხვევა. Google-ის კონკურენტებმა, მათ შორის OpenAI-მ და Meta-მ, უკვე გამოუშვეს ხელოვნური ინტელექტის აგენტები, რომლებსაც მომხმარებლის სახელით ონლაინშოპინგი შეუძლიათ. Shopify-მაც (Shopify) ცოტა ხნის წინ განაცხადა, რომ პლატფორმას მეტი ასეთი აგენტისთვის გახსნის. ისინი Shopify-ზე განთავსებული პროდუქტების დათვალიერებასა და შეძენას შეძლებენ. მსხვილი ტექნოლოგიური კომპანიები ამ შეჯიბრებაში იმ ვარაუდით ერთვებიან, რომ ონლაინშოპინგის მომავალში სამუშაოს უდიდეს ნაწილს მომხმარებლის ნაცვლად რობოტი შეასრულებს.