ჰაკერმა John Deere-სა და SharkNinja-ში ხელოვნური ინტელექტით შეაღწია

ხელოვნური ინტელექტის უსაფრთხოების კომპანია Norforge-ის დასკვნის თანახმად, ჰაკერმა 100-ზე მეტ ვებგვერდში აგენტების ჯგუფით შეაღწია. ისინი ძირითადად დამოუკიდებლად მოქმედებდნენ. Norforge სამიზნეებს არ ასახელებს, თუმცა როიტერსის ცნობით, დაზარალებულებს შორის John Deere, SharkNinja და Cummins იყვნენ.

ტექნოლოგიის განვითარებასთან ერთად, ხელოვნური ინტელექტით განხორციელებული კიბერუსაფრთხოების დარღვევები მზარდ შეშფოთებას იწვევს. ჰაკერები ამ ხელსაწყოებს მასშტაბური თავდასხმებისთვის იყენებენ. ამავე დროს, ტესტირების გარემოდან გაქცეული უმართავი აგენტები თავდასხმებს დამოუკიდებლად ახორციელებენ.

Norforge-ის მკვლევრებმა თავდასხმები Cairn-ზე გასაჯაროებული მუშაობის მასალებით აღმოაჩინეს. Cairn ღია კოდის ხელოვნური ინტელექტის პლატფორმაა, რომელიც თავს „ზოგადი დანიშნულების პრობლემების გადაჭრის ძრავად“ აღწერს. მომხმარებლები აგენტებს საწყის და საბოლოო წერტილებს უსაზღვრავენ. დავალების შესრულებისას აგენტები საკუთარ პროგრესს აღრიცხავენ. თუმცა Norforge-ის ცნობით, ჰაკერებს ამ ხელსაწყოთი აგენტების მონაწილეობით კიბერშეტევების ორგანიზებაც შეუძლიათ.

Norforge-ის მიერ აღმოჩენილ Cairn-ის გასაჯაროებულ ნიმუშებს შორის ყველაზე აქტიური ჰაკერი 100-ზე მეტ ვებგვერდში შეიჭრა. როიტერსის ცნობით, ის აშშ-ში, კანადაში, ავსტრალიასა და იაპონიაში მდებარე კომპანიებს უტევდა. თავდამსხმელმა „შეღწევის სასურველი ტაქტიკა“ 100-ზე ნაკლები ჩინური იეროგლიფით აღწერა. როიტერსის ცნობით, წარმატებულ შეღწევას დაახლოებით 23 საათი სჭირდებოდა. მთლიანობაში, Nordforge-მა Cairn-ის 20-ზე მეტი გასაჯაროებული ნიმუში აღმოაჩინა, რომლებიც „სავარაუდოდ მავნეა“.

John Deere-ის წარმომადგენელმა როიტერსს განუცხადა, რომ თავდასხმის შედეგად „სენსიტიურ ინფორმაციაზე წვდომის ნიშნები არ ჩანს“. Cummins-მა განაცხადა: „ჩვენ ვიძიებთ ცნობას შესაძლო კიბერშეტევის შესახებ ვებგვერდზე, რომელსაც ჩვენი ერთ-ერთი გარე მომწოდებელი მართავს“.

SharkNinja-ს განცხადებით, შეღწევა შეეხო ცალკე ვებგვერდს, რომელიც პროდუქტების მხარდაჭერის ინფორმაციას შეიცავდა. კომპანიამ საფრთხე აღკვეთა. John Deere-ს, Cumms-სა და SharkNinja-ს ვერჯის კომენტარის თხოვნაზე დაუყოვნებლივ არ უპასუხიათ.

Nordforge-ის განცხადებით, კომპანია Cairn-ის მავნე ნიმუშების გაუქმებაზე მუშაობს. პლატფორმის შემქმნელმა, რომელიც @le1xia0-ის სახელითაა ცნობილი, ამ თვის დასაწყისში თქვა: „პლატფორმა არასდროს ყოფილა ‘ჰაკერული ხელსაწყო’“. მან დასძინა: „ბოროტად გამოყენება ადამიანის გადაწყვეტილებაა და არა ძრავის ფუნქცია“.