ინფანტინომ მსოფლიო ჩემპიონატისთვის 1,72 მილიონი დოლარი მიიღო

აშშ-ში დაფუძნებული არაკომერციული ორგანიზაციები IRS-ის ფორმა 990-ს ყოველწლიურად წარადგენენ. ამ დოკუმენტის თანახმად, ინფანტინომ 2024 წელს FWC2026-ისგან 1,72 მილიონი დოლარი მიიღო. FWC2026 ფიფას მიერ შექმნილი ოფიციალური ამერიკული ორგანიზაციაა, რომელიც 2026 წლის მსოფლიო ჩემპიონატს მართავს.

ეს თანხა დაემატა ინფანტინოს 2024 წლის ხელფასსა და შეღავათებს, რომლებიც ფიფამ გადაუხადა. იმ წლის ფინანსური ანგარიშების თანახმად, მათი მოცულობა 4,274 მილიონ შვეიცარიულ ფრანკს, ანუ დაახლოებით 4,86 მილიონ დოლარს შეადგენდა. ფიფას 2024 წლის წლიურ ანგარიშში დამატებითი ანაზღაურება მითითებული არ იყო. ეს ბოლო წელია, რომლისთვისაც FWC2026-ის ფორმა 990 საჯაროდ ხელმისაწვდომია.

ფიფას წესდების 43-ე მუხლის მე-13 პუნქტში წერია: „ანაზღაურების ქვეკომიტეტმა, კერძოდ, ანაზღაურების წესები უნდა განსაზღვროს. მან ასევე ფიფას პრეზიდენტის, საბჭოს წევრებისა და გენერალური მდივნის ანაზღაურება უნდა დაადგინოს. ფიფას პრეზიდენტის, საბჭოს წევრებისა და გენერალური მდივნის ინდივიდუალური ანაზღაურება უნდა გასაჯაროვდეს“.

ფიფას წარმომადგენელმა ESPN-ს ტექსტური შეტყობინებით განუცხადა: „ფიფა ანგარიშგების ყველა მოთხოვნას სრულად იცავს და კატეგორიულად უარყოფს ნებისმიერ მინიშნებას, რომ ფიფას წესდება დაირღვა“.

გაზეთმა The Times-მა პირველმა გაავრცელა ინფორმაცია, რომ ინფანტინომ FWC2026-ისგან დამატებითი ანაზღაურება მიიღო და, როგორც ჩანს, ფიფას წესდება დაირღვა.

ფიფას მმართველობის კომიტეტის ყოფილმა თავმჯდომარე მიგელ მადურომ The Times-ს განუცხადა: „თუ ის ფიფასთან დაკავშირებული კომპანიებისგან სხვა თანხებს იღებს და ამას არ ასაჯაროებენ, დამატებითი ხელფასის გაუმჟღავნებლობა წესების აშკარა დარღვევაა. ფიფას წესდება სრულ გამჭვირვალობას მოითხოვს. ფიფას ანაზღაურების ქვეკომიტეტმა ანაზღაურების სხვა ფორმები არ უნდა დაამტკიცოს. ვეთანხმები, რომ ფიფას პრეზიდენტს ძალიან მაღალი ანაზღაურება სჭირდება, მაგრამ ეს გამჭვირვალე უნდა იყოს“.

ინფანტინოს დამატებითი ხელფასის გასაჯაროება ფიფას პრეზიდენტთან დაკავშირებული დაპირისპირებების მხოლოდ ბოლო შემთხვევაა. მიმდინარე წლის დასაწყისში ცნობილი გახდა, რომ ინფანტინომ მსოფლიო ჩემპიონატის 20%-იანი წილის გარე ინვესტორებისთვის მიყიდვის გეგმა შეიმუშავა. ინვესტორებს ჯოშუა კუშნერი ხელმძღვანელობდა, ხოლო ინფანტინომ ამ ინიციატივას Football Forward Enterprises უწოდა.

კუშნერი ჯარედ კუშნერის უმცროსი ძმაა. ჯარედ კუშნერი აშშ-ის პრეზიდენტ დონალდ ტრამპის სიძეა. აშშ-ში, კანადასა და მექსიკაში მიმდინარე წელს გამართული მსოფლიო ჩემპიონატის წინ ინფანტინომ ტრამპთან მჭიდრო კავშირები დაამყარა და თეთრ სახლს რეგულარულად სტუმრობდა.