ისრაელის დარტყმას ღაზაში ორი პალესტინელი ემსხვერპლა

მედიკოსების თქმით, ღაზის ქალაქში ავტომობილზე ისრაელის საჰაერო დარტყმას სულ მცირე ორი ადამიანი ემსხვერპლა, ხოლო 13 დაიჭრა.

ჯანდაცვის ოფიციალურმა პირებმა განაცხადეს, რომ კვირას თალ ალ-ჰავის უბანში თავდასხმისას დაღუპულთა სხეულები დაინაწევრა. მათ საზოგადოებას სთხოვეს ინფორმაცია, რომელიც დაღუპულთა ამოცნობაში დაეხმარებოდათ.

სოციალურ მედიაში გავრცელებულ და ალ-ჯაზირის (Al Jazeera) მიერ გადამოწმებულ კადრებში დამიზნებული ავტომობილი დამახინჯებული და გამომწვარი ჩანდა. მას სახურავი და კარები მოგლეჯილი ჰქონდა.

ისრაელის სამხედრო ძალებმა განაცხადეს, რომ სამიზნე ჰამასის ორი მებრძოლი იყო.

ეს დარტყმა თითქმის ყოველდღიური ისრაელის თავდასხმების ბოლო შემთხვევაა. თავდასხმები ომით განადგურებულ და ალყაში მოქცეულ პალესტინის ტერიტორიაზე გასული წლის ოქტომბერში ისრაელსა და ჰამასს შორის „ცეცხლის შეწყვეტის“ შეთანხმების შემდეგ გრძელდება.

ჯანდაცვის უწყებების მონაცემებით, აშშ-ის შუამავლობით მიღწეული „ზავის“ დაწყების შემდეგ ღაზაში ისრაელის თავდასხმებს 1 300-ზე მეტი პალესტინელი ემსხვერპლა.

ჰამასმა ისრაელი „ცეცხლის შეწყვეტის“ დარღვევასა და აშშ-ის პრეზიდენტ დონალდ ტრამპის გეგმისთვის ხელის შეშლაში დაადანაშაულა. გეგმა ღაზაში პალესტინელების წინააღმდეგ გენოციდური ომის დასრულებას, საბოლოოდ პალესტინის ტერიტორიიდან ისრაელის გასვლასა და ჰამასის განიარაღებას ითვალისწინებს.

ტრამპმა შაბათს ირლანდიაში ვიზიტისას ღაზასთან დაკავშირებით თავისი ადმინისტრაციის საქმიანობა დაიცვა: „ჩვენ ცეცხლი ჩავაქრეთ და ყველა მძევალი დავაბრუნეთ. ახლა ღაზაში ძალიან ცოტა რამ ხდება“.

ტრამპმა დასძინა: „თუ ღაზას შეხედავთ, ახლა იქ ბევრი კარგი ურთიერთობა ყალიბდება. ეს საკმაოდ გასაოცარია. ვფიქრობ, შესანიშნავად ვიმუშავეთ“.

ადგილობრივი ხელისუფლების მონაცემებით, 2023 წლის ოქტომბრიდან ისრაელის გენოციდურ ომს სულ მცირე 73 669 ადამიანი ემსხვერპლა. დაღუპულთა უმრავლესობა ქალი და ბავშვია.