ისრაელის ძალებმა დასავლეთ სანაპიროზე რეიდები ჩაატარეს და ათეულობით პალესტინელი დააკავეს

ისრაელმა ოკუპირებული დასავლეთ სანაპირო სრულად ჩაკეტა, ჰებრონში სროლის შედეგად ორი ჯარისკაცის დაღუპვის შემდეგ

ისრაელის ძალებმა ქალაქებს შეუტიეს და ათეულობით პალესტინელი დააკავეს. ეს პრემიერ-მინისტრ ბენიამინ ნეთანიაჰუს მიერ ოკუპირებული დასავლეთ სანაპიროს სრული ჩაკეტვის ბრძანების გაცემიდან რამდენიმე საათში მოხდა. ბრძანება ჰებრონში თავდასხმის შემდეგ გაიცა, რომელსაც ორი ისრაელელი ჯარისკაცი ემსხვერპლა.

Al Jazeera-ს კორესპონდენტების ცნობით, შაბათს ისრაელის ძალებმა დასავლეთ სანაპიროს ჩრდილოეთით სულ მცირე 15 ქალაქსა და დასახლებაში ჩაატარეს რეიდები და ათეულობით პალესტინელი დააკავეს.

სამხედრო რეიდები ჩრდილოეთის რამდენიმე ქალაქსა და დასახლებას შეეხო, მათ შორის ნაბლუსს, ჯენინს, ტუბასსა და ქალქილიას.

ნაბლუსში ისრაელის ძალებმა ადამიანები დააკავეს და პალესტინელთა სახლები დაარბიეს სოფლებში, ჯალუდსა და ქარიუთში. ჯენინთან ახლოს, არაბესა და ბურკინშიც დააკავეს ადამიანები. ისრაელის ძალები ტუბასში და მის მახლობლად მდებარე აქაბაში შევიდნენ.

ოკუპირებული დასავლეთ სანაპიროს სამხრეთში ისრაელის ბულდოზერებმა ჰებრონში სამსართულიანი შენობა დაანგრიეს. ოჯახებს ნივთების შესაგროვებლად ხუთი წუთი მისცეს. ისრაელის ძალებმა ასევე ასობით პალესტინელ ოჯახს უბრძანეს, იძულებით დაეტოვებინათ სახლები ჰებრონის ეინ დეირ ბაჰას ტერიტორიასა და მის შემოგარენში.

ისრაელელი ჯარისკაცები ასევე ალყაში მოექცნენ ერთ-ერთი ეჭვმიტანილის სახლს. ეჭვმიტანილს ჰებრონში თავდასხმასთან აკავშირებენ, რომელსაც ორი ისრაელელი ჯარისკაცი ემსხვერპლა. ამავე დროს, ჯარისკაცებმა ქალაქის ალ-ჯალდის უბანში რეიდები ჩაატარეს.

ისრაელის არმიამ პარასკევს გვიან განაცხადა, რომ მისმა ძალებმა ჰებრონში ოპერაცია დაიწყეს, რომელიც „რამდენიმე დღე“ გაგრძელდებოდა. სხვა ძალები კი დასავლეთ სანაპიროს „ათობით“ რაიონში ოპერაციებს ატარებდნენ.

უფრო აღმოსავლეთით ისრაელის ძალები იერიხონში და მის მახლობლად მდებარე აქაბათ ჯაბრის ლტოლვილთა ბანაკში შევიდნენ.

ჩაკეტვის პირობებში დასავლეთ სანაპიროზე არსებული თითქმის 1 000 საკონტროლო პუნქტი და ჭიშკარი დაიკეტება, რაც მილიონობით პალესტინელს შეეხება.

ნეთანიაჰუმ ბრძანება პარასკევს გასცა, მას შემდეგ, რაც ისრაელის სამხედროებმა განაცხადეს, რომ მოკლეს ორი პალესტინელი შეიარაღებული პირი. ისინი ისრაელის დასახლება ტელემთან ახლოს სარეზერვო ბატალიონს დაესხნენ თავს. თავდასხმას ორი ჯარისკაცი ემსხვერპლა.

ისრაელის სასწრაფო დახმარების სამსახურმა თავდაპირველად განაცხადა, რომ სულ მცირე ხუთი ისრაელელი ჯარისკაცი დაიჭრა. მათგან ორი მოგვიანებით დაიღუპა.