იტალიის თავდაცვის მინისტრმა ტრამპის უკრაინის პოლიტიკა გააკრიტიკა

კენჭისყრა 2027 წლის ბოლომდე უნდა გაიმართოს. საზოგადოებრივი აზრის ამჟამინდელი კვლევებით, ახალი ულტრამემარჯვენე პარტია, ეროვნული მომავალი (Futuro Nazionale), მელონის კოალიციის ყველა პარტნიორს უსწრებს.

ამ პარტიის ლიდერი, ყოფილი გენერალი რობერტო ვანაჩი, რუსეთის მიმართ ღია სიმპათიით გამოირჩევა და უკრაინის დახმარებას ეწინააღმდეგება. მისი მტკიცებით, ევროპა ფულს ფლანგავს, რადგან რუსეთის სამხედრო ძალები ადგილზე „წინსვლას განაგრძობენ“.

ვანაჩიმ ტოსკანაში გამართულ ბოლო ღონისძიებაზე საკუთარი თავი ასე აღწერა: „არც პუტინის მომხრე ვარ და არც რუსეთის, მე იტალიის მომხრე ვარ“.

კროზეტომ ვანაჩის შესახებ კითხვები უკუაგდო. კითხვები იმასაც შეეხებოდა, ასახავდა თუ არა ვანაჩის შეხედულებები ბევრი იტალიელის პოზიციას. მინისტრის თქმით, მას „უფრო სერიოზული საკითხები ჰქონდა მოსაგვარებელი“.

თუმცა, შესაძლოა, განსხვავების ხაზგასასმელად, მან რუსეთის მიმართ ერთმნიშვნელოვანი პოზიცია გამოხატა.

კროზეტომ განაცხადა: „როცა ერთი სახელმწიფო ტანკებით სხვა სახელმწიფოს საზღვარს კვეთს, საავადმყოფოებსა და სკოლებს ბომბავს, მშვიდობიან მოსახლეობას კლავს, ელექტროსადგურებს ანადგურებს და ამას ოთხი წლის განმავლობაში აკეთებს, ამას მხოლოდ ბოროტება შემიძლია ვუწოდო“.

თუმცა, ბევრი ევროპელის მსგავსად, იტალიელებიც ფასების ზრდას ხედავენ, რასაც ენერგიის მაღალი ღირებულება განაპირობებს.

პარასკევს რომში გამართულ ქუჩის საპროტესტო აქციებზე, სადაც ასაფეთქებელ შუშხუნებს ისროდნენ, საშუალო სკოლის მოსწავლეები ჩიოდნენ, რომ რესურსები განათლების ნაცვლად შეიარაღებაზე იხარჯებოდა.

ზოგი სკანდირებდა: „მეტი საკლასო ოთახი გვინდა და არა მეტი ბომბი“.

სამხრეთ იტალიაში სატვირთო მანქანების მძღოლებმა საწვავის ფასების ზრდის გამო გზების გადაკეტვა დაიწყეს.

კვლევები რეგულარულად აჩვენებს, რომ იტალიელთა უმრავლესობას უკრაინის სამხედრო დახმარების დასრულება სურს. სექტემბერში Ixè-ს ინსტიტუტისთვის ჩატარებული ერთ-ერთი კვლევის თანახმად, იარაღის მიწოდების გაგრძელებას მხოლოდ 18% უჭერდა მხარს.

ამ დამოკიდებულებას მრავალი მიზეზი აქვს, მათ შორის, ხანგრძლივი პაციფისტური ტრადიცია და მოსკოვთან ძლიერი საქმიანი კავშირების ისტორია. პოლონეთისა და ბალტიის ქვეყნებისგან განსხვავებით, იტალია საფრთხისგან ფიზიკურად დაშორებულადაც გრძნობს თავს.

თავდაცვის მინისტრმა პასუხისმგებლობა მოსკოვის დეზინფორმაციის აქტიურ კამპანიასაც დააკისრა. მისი თქმით, კამპანია მიზანში იღებს „გარკვეულ პოლიტიკურ ფიგურებსა და ნარატივებს, რათა რუსეთის წინააღმდეგ პოლიტიკური გარემო შეასუსტოს“.

მინისტრმა აღნიშნა: „ისინი გარკვეულწილად საზოგადოებრივ აზრს ცვლიან“.

კროზეტომ დასძინა: „ძალიან რთულია, ბენზინგასამართ სადგურზე გაჭირვებულ მოქალაქეს აუხსნა, რომ ახლა რუსეთისთვის ვერავითარ დათმობაზე ვერ წავალთ. თუმცა, სწორედ ასე უნდა დავიცვათ იმ მოქალაქის მომავალი, რომელიც ჩივის“.

ევროპაში უკრაინის სხვა მოკავშირეებისგან განსხვავებით, იტალია მასშტაბური დივერსიული აქტების სამიზნე არ გამხდარა.

მინისტრმა განაცხადა, რომ აგვისტოში რომის გარეთ მდებარე იარაღის საწყობში გაჩენილი ხანძარი განზრახ დაწვა კი არა, „ადამიანური სისულელე“ იყო.

კროზეტომ ბი-ბი-სის ასევე განუცხადა, რომ გასულ თვეში გავრცელებული ცნობა არ დადასტურდა. ცნობის თანახმად, რუსეთი ხმელთაშუა ზღვაში მცურავი საკონტეინერო გემებიდან იტალიაზე, საფრანგეთსა და ესპანეთზე დრონებით თავდასხმებს გეგმავდა.

თუმცა, მინისტრის თქმით, რუსეთთან დაკავშირებული კიბერშეტევები უკვე ყოველდღიურობად იქცა და „ყოველდღე ასობით შემთხვევა ხდება“. კროზეტოს აზრით, ევროპის პასუხი ზედმეტად სუსტი იყო.

მინისტრმა თქვა: „ომს ვერ მოიგებ, თუ საპასუხოდ არ იბრძოლებ“.

მასალის მომზადებაში რომიდან დავიდე გილიონე მონაწილეობდა.

თემებიგუიდო კროზეტოდონალდ ტრამპივლადიმერ პუტინირობერტო ვანაჩიჯორჯა მელონიბი-ბი-სიაშშიტალიარუსეთიუკრაინა

გამოქვეყნდა 17 ოქტომბერი, 2026