ჯანი ინფანტინოს ფიფას საბჭოს მწვავე კითხვები ელის

მოწინააღმდეგეები დამოუკიდებელი შემოწმების მოთხოვნას დააყენებენ

ხუთშაბათს ფიფას შტაბ-ბინაში საბჭოს შეხვედრა გაიმართება, რომელიც, სავარაუდოდ, დაძაბული იქნება. საბჭოს წევრები ჯანი ინფანტინოს მსოფლიო ჩემპიონატის კომერციალიზაციის ჩაშლილ გეგმაში მონაწილეობაზე, ფოლარინ ბალოგუნის საქმესა და დონალდ ტრამპისთვის ფიფას პირველი მშვიდობის პრიზის მინიჭებაზე მწვავე კითხვებს დაუსვამენ.

ფიფას საკამათო ინიციატივის, Fifa Forward Enterprise-ის (FFE), გასაჯაროების შემდეგ, ინფანტინომ ზაფხულში საბჭოს რიგგარეშე საერთო სხდომის მოწვევის არაერთი მოთხოვნა უარყო. მას შემდეგ ფიფას პრეზიდენტი კრიტიკოსებს პირველად ციურიხში შეხვდება. შეხვედრის ერთ-ერთი მონაწილე ვარაუდობს, რომ საუბარი შესაძლოა „ფეთქებადი“ იყოს.

უეფას, Concacaf-ისა და აზიის ფეხბურთის კონფედერაციის პრეზიდენტები, შესაბამისად, ალექსანდერ ჩეფერინი, ვიქტორ მონტალიანო და შეიხ სალმან ბინ იბრაჰიმ ალ-ხალიფა შეხვედრას დაესწრებიან. სამივემ ინფანტინოს გადადგომისკენ მოუწოდა. ისინი ფიფას მმართველობის დამოუკიდებელი შემოწმების მოთხოვნას დააყენებენ.

ჩეფერინმა, მონტალიანომ და სალმანმა ინფანტინოს წერილები გასულ თვეში გაუგზავნეს. პასუხად ინფანტინო ფიფას სამომავლო მმართველობის გარე შემოწმების დაკვეთას დაჰპირდა. თუმცა, დამატებითი დეტალები არ გამოქვეყნებულა და კვლავ საეჭვოა, იქნება თუ არა შემოწმება ნამდვილად დამოუკიდებელი.

FFE-ის, ბალოგუნისა და მშვიდობის პრიზის გარდა, რომლებიც ფიფას მიერ გასულ თვეში გავრცელებულ დღის წესრიგში მოხვდა, ინფანტინოს, სავარაუდოდ, სხვა კითხვებიც ელის. გაზეთმა Times-მა ამ კვირაში გაავრცელა ინფორმაცია, რომ 2024 წელს მან დაახლოებით 1,3 მილიონი ფუნტის ოდენობის „მეორე ხელფასი“ მიიღო. ეს ფიფას ანგარიშებში დეკლარირებულ 3,9 მილიონ ფუნტს ემატებოდა.

აშშ-ის შიდა შემოსავლების სამსახურში წარდგენილი დოკუმენტების თანახმად, ფიფას შვილობილმა კომპანიამ, რომელიც გასული ზაფხულის მსოფლიო ჩემპიონატის ჩატარებაზე იყო პასუხისმგებელი, ინფანტინოს 1,76 მილიონი დოლარი, ანუ 1,3 მილიონი ფუნტი გადაუხადა. თანხა ფიფას წლიურ ანგარიშში ნახსენები არ ყოფილა. ამ ანგარიშში მისი ხელფასი 4,27 მილიონ შვეიცარიულ ფრანკად, ანუ 3,88 მილიონ ფუნტადაა მითითებული.

ფიფას წესდებაში წერია: „ფიფას პრეზიდენტის ინდივიდუალური ანაზღაურება [...] საჯაროდ უნდა გამოქვეყნდეს“. მმართველმა ორგანომ დარღვევა უარყო.

ფიფამ განცხადებაში აღნიშნა: „ფიფა პრეზიდენტს მეორე ხელფასს არ უხდის და ანაზღაურებასთან დაკავშირებულ ანგარიშგების ყველა მოთხოვნას ასრულებს. ფიფას პრეზიდენტის წლიურ ანაზღაურებასა და სხვა სახელშეკრულებო შეღავათებს ანაზღაურების დამოუკიდებელი ქვეკომიტეტი განსაზღვრავს.