ჯეი ჯეი გაბრიელმა მანჩესტერ იუნაიტედიდან წასვლა მოითხოვა

15 წლის ნიჭიერი ფეხბურთელის, ჯეი ჯეი გაბრიელის მოთხოვნამ მანჩესტერ იუნაიტედი გააკვირვა და საგონებელში ჩააგდო. მან კლუბიდან წასვლა მოითხოვა. ეს მან ბრაიტონთან მატჩისთვის ძირითად გუნდში მოსალოდნელ გამოძახებამდე ერთი დღით ადრე გააკეთა.

გაბრიელს ოთხშაბათს, ოლდ ტრაფორდზე, კარაბაოს თასის მესამე წრის მატჩში იუნაიტედის ყველაზე ახალგაზრდა ფეხბურთელი შეეძლო გამხდარიყო. თუმცა, გარდიანის ინფორმაციით, მან საკუთარი რეგისტრაციის გაუქმება მოითხოვა.

იუნაიტედისთვის გაურკვეველია, რამ გამოიწვია ეს გადაწყვეტილება. კლუბს მიაჩნია, რომ გაბრიელსა და მის ოჯახს ძირითად გუნდამდე გზის არსებობა ყველა შესაძლო საშუალებით დაანახა. ამისთვის მათ რუბენ ამორიმთან, რომელიც მაშინ მთავარი მწვრთნელი იყო, და სერ ალექს ფერგიუსონთან შეხვედრებიც გამართეს.

იუნაიტედს მიაჩნია, რომ ვითარების გამოსწორება შესაძლებელია, რადგან გაბრიელის კონტრაქტის ამოწურვამდე დრო რჩება. ინფორმაცია პირველად ტელეგრაფმა (The Telegraph) გაავრცელა. კლუბის წარმომადგენლები ამბობენ, რომ ფეხბურთელის ხელშეკრულება სეზონის ბოლომდე მოქმედებს. მათი თქმით, მოთხოვნის მიუხედავად, მისი რეგისტრაციის გაუქმება შეუძლებელია. ჩრდილოეთ ლონდონში დაბადებული გაბრიელი პროფესიულ კონტრაქტს მომავალი წლის ოქტომბერში, 17 წლის გახდომამდე ვერ გააფორმებს. თუმცა, 16 წლის ასაკში მას აკადემიის სტიპენდიის ხელშეკრულების გაფორმება შეუძლია.

გაბრიელი იუნაიტედში 11 წლის ასაკიდან თამაშობს. ბოლო წლებში ის კარინგტონის ერთ-ერთ ყველაზე იმედისმომცემ ფეხბურთელად ჩამოყალიბდა და ახალგაზრდულ გუნდებში მრავალი გოლი გაიტანა. გასულ კვირას მან უეფას ახალგაზრდულ ლიგაში სადებიუტო მატჩში საბაჰის წინააღმდეგ ჰეთ-თრიკი შეასრულა. გაბრიელი ხშირად უფროს ასაკობრივ გუნდებში თამაშობს. გასულ სეზონში მან 29 მატჩში 26 გოლი გაიტანა. მან ინგლისის 17-წლამდელთა ნაკრებშიც ორი მატჩი ჩაატარა. გაბრიელმა ბოლოს მოიგო იუნაიტედის პრესტიჟული ჯიმი მერფის სახელობის წლის ახალგაზრდა ფეხბურთელის ჯილდო და მისი ყველაზე ახალგაზრდა მფლობელიც გახდა. ის ძირითად გუნდთან ერთად რეგულარულად ვარჯიშობდა.

საბაჰთან 5:0 გამარჯვების შემდეგ იუნაიტედის 21-წლამდელთა გუნდის მთავარმა მწვრთნელმა ადამ ლოურენსმა თქვა: „ჯეი ჯეის გარშემო, კლუბის ხელმძღვანელობიდან ყველა სხვა რგოლამდე, არიან ადამიანები, რომლებსაც მისი ნამდვილად ძალიან სჯერათ. ის კლუბში უკვე დიდი ხანია თამაშობს. მას ფეხბურთელებსა და თანამშრომლებთან მართლაც კარგი ურთიერთობა აქვს. ვფიქრობ, დროთა განმავლობაში ესეც ეხმარება.

„ამჟამად, რაც შეეხება მის თამაშს, მატჩებისა და ვარჯიშის პროგრამას, მნიშვნელოვანია, რომ სხვადასხვა დონეზე სათანადო გამოცდილება მიიღოს. ცხადია, სრულყოფილები არ ვართ, მაგრამ ამ საკითხზე ნამდვილად ბევრს ვფიქრობთ“.