კარტალმა სვიტოლინა დაამარცხა და უხანის ნახევარფინალში გავიდა

24 წლის ბრიტანელი ზურგის სტრესული მოტეხილობის გამო ექვს თვეზე მეტხანს ვერ თამაშობდა. კარტალმა უკრაინელ სვიტოლინას 6-2, 2-6, 6-4 მოუგო. ტრავმის შემდეგ დაბრუნებიდან მან რვა მატჩში ექვსი გამარჯვება მოიპოვა.

კარტალმა კიდევ ერთი შთამბეჭდავი თამაში ჩაატარა. წინა ეტაპებზე მან მე-15 ნომრად განთესილი იტალიელი ჟასმინ პაოლინი და მეცხრე ნომრად განთესილი შვეიცარიელი ბელინდა ბენჩიჩი დაამარცხა.

შაბათს კარტალი WTA 1000-ის პირველ ნახევარფინალში 2017 წლის როლან გაროსის ჩემპიონ ელენა ოსტაპენკოს შეხვდება. ოსტაპენკომ დაძაბული პირველი სეტის შემდეგ მე-11 ნომრად განთესილი დიანა შნაიდერი 7-6 (8-6), 6-1 დაამარცხა.

2009 წელს ამ ფორმატის შემოღების შემდეგ კარტალი მეორე ბრიტანელი ჩოგბურთელია, რომელმაც WTA 1000-ის ნახევარფინალში გასვლა შეძლო. პირველი ჯოანა კონტა იყო.

კარტალმა გამარჯვების შემდეგ კორტზე თქვა, რომ იცოდა, მსოფლიოს მეექვსე ჩოგანი სვიტოლინა „რა ძლიერი მებრძოლია“. ამიტომ მატჩის განმავლობაში თავს „არასდროს გრძნობდა უსაფრთხოდ“.

კარტალმა დასძინა: „მთელი მატჩის განმავლობაში სიმშვიდე მყარად შევინარჩუნე. ამ კვირაში ჩემთვის ახალ სიმაღლეებს ვაღწევ“.

მან ასევე აღნიშნა: „აქ და ამ კორტზე თამაში მიყვარს. ატმოსფერო საოცარი იყო, ამიტომ მაყურებელს დიდ მადლობას ვუხდი“.

უხანში მეოთხედფინალამდე კარტალს სეტი არ წაეგო. პირველ სეტში მან სვიტოლინას მოწოდება მალევე მოიგო და შეხვედრა წარმატებით დაიწყო.

შემდეგ სვიტოლინამ მარჯვენა ხელის სამკურნალოდ სამედიცინო შესვენება მოითხოვა. თუმცა ის ძლიერად დაბრუნდა, მეორე სეტი 6-2 მოიგო და მეოთხედფინალური მატჩი გადამწყვეტ სეტამდე მიიყვანა.

მესამე სეტში ჩოგბურთელები თანაბრად თამაშობდნენ. დაცული რეიტინგით მონაწილე კარტალმა 5-4-ზე სვიტოლინას მოწოდება მოიგო და ნახევარფინალში ადგილი გაინაღდა.

სხვა მეოთხედფინალებში მე-16 ნომრად განთესილი პოლონელი მაია ხვალინსკა ბერძენ მარია საკარის შეხვდება. ამერიკელი ენ ლი დიდი სლემის ექვსგზის გამარჯვებულ და მეშვიდე ნომრად განთესილ იგა შვიონტეკს დაუპირისპირდება.