კატარის გარიგება აშშ-დან გაზის შესაძენად ომის გავლენას აჩვენებს

ასევე სრულიად გაურკვეველია, როგორი იქნება ჰორმუზის უსაფრთხოების პირობები რას-ლაფანში სარემონტო სამუშაოების დასრულების შემდეგ. Rapidan Energy-ის წარმომადგენლის, ალექს მანტონის თქმით, Cheniere-თან დადებული ათწლეულების ხანგრძლივობის ხელშეკრულება იმაზე მიუთითებს, რომ კატარი ჰორმუზში ნაოსნობის თავისუფლების აღდგენის კუთხით რისკს ხედავს, რადგან ირანი ნავთობმზიდებზე თავდასხმებს განაგრძობს.

ანალიტიკოსის თქმით, LNG-ის შემთხვევაში ჰორმუზის გვერდის ავლის გზების მოძებნა უფრო რთულია, რადგან ეს პროდუქტი ძირითადად წყლით გადაიზიდება.

მანტონმა თქვა: „გაზი თხევადდება, რათა გემით გადაიზიდოს, ამას კი საზღვაო მარშრუტებზე წვდომა სჭირდება. მათ ჰორმუზის სრუტეზე უნდა ჰქონდეთ წვდომა. LNG-ის ბაზარზე სხვაგვარად მიწოდება შეუძლებელია. ისინი უბრალოდ ჩიხში არიან“.

მანტონის თქმით, რადგან წარმოება მძიმედ არის დაზიანებული, ჰორმუზი კი ჩაკეტილია, QatarEnergy Cheniere-თან გარიგებით LNG-ით ვაჭრობის საქმიანობას აფართოებს.

UBS-ის ანალიტიკოსმა მანავ გუპტამ ხუთშაბათს კლიენტებისთვის გაგზავნილ შენიშვნაში დაწერა, რომ ამ თვის დასაწყისში QatarEnergy-მ ჩინური ბანკებისგან 3 მილიარდი დოლარის სესხი მიიღო. ამან შესაძლოა კომპანიას მეტი ამერიკული LNG-ის შესყიდვის საშუალება მისცეს, რათა საერთაშორისო მიწოდების ვალდებულებები შეასრულოს.

Reuters-ის ცნობით, Venture Global QatarEnergy-სთან მოწინავე მოლაპარაკებებს აწარმოებს ყოველწლიურად 3 მილიონი მეტრული ტონა გაზის მიწოდებაზე. ამის შესახებ სააგენტოს ანონიმურმა წყაროებმა განუცხადეს.

გუპტის თქმით, კატართან დადებული გარიგებით Cheniere უარყოფს პესიმისტი ინვესტორების მოსაზრებას, რომ კომპანიას დამატებითი გაყიდვების უზრუნველყოფა გაუჭირდება, რაც, თავის მხრივ, სიმძლავრის გაფართოებას შეზღუდავს. UBS Cheniere-ის აქციების სამიზნე ფასად 340 დოლარს ასახელებს, რაც ხუთშაბათის დახურვის ფასთან შედარებით 18%-იან ზრდას გულისხმობს.

უოლ-სტრიტზე Cheniere-ისა და Venture Global-ის მიმართ განწყობა ძირითადად დადებითია. Cheniere-ს შემფასებელი აქციების ანალიტიკოსების თითქმის 90% მის ყიდვას ურჩევს. საშუალო სამიზნე ფასი 314 დოლარია, რაც ხუთშაბათის დახურვის ფასთან შედარებით დაახლოებით 9%-იან ზრდას გულისხმობს.

Venture Global-ის აქციების ყიდვას ანალიტიკოსების თითქმის 60% ურჩევს, დანარჩენები კი მათ შენარჩუნებას ემხრობიან. საშუალო სამიზნე ფასი 17 დოლარია, რაც ხუთშაბათის დახურვის ფასთან შედარებით დაახლოებით 35%-იან ზრდას ნიშნავს.

მანტონმა თქვა: „მყიდველები კვლავ აშშ-ს მიმართავენ, რათა მიწოდების წყაროები გაამრავალფეროვნონ. აშშ-ში იმდენი ობიექტი შენდება, რომ ახლა ქვეყანა გლობალური LNG-ბაზრის წილით არაპროპორციულად დიდ მოთამაშედ იქცევა“.

თემებიალექს მანტონიმანავ გუპტასაად შერიდა ალ-ქააბიჯეკ ფუსკოCheniere EnergyQatarEnergyRapidan EnergyVenture Globalკატარირას-ლაფანი

გამოქვეყნდა 24 ოქტომბერი, 2026