კომომ მანჩესტერ იუნაიტედთან მატჩამდე ჩემპიონთა ლიგის განაცხადში ცვლილება შეიტანა

კომოს ჩემპიონთა ლიგის განაცხადში ტრავმირებული ხესუს როდრიგესი მაქსენს კაკერეტით შეცვლის ნება დართეს, ამიტომ ფრანგი დღეს მანჩესტერ იუნაიტედთან მატჩში ითამაშებს.

უეფამ კომოს ჩემპიონთა ლიგის განაცხადში ცვლილების შეტანის ნება მისცა. თავდაპირველ სიაში ფრანგი ნახევარმცველი კაკერეტი არ იყო.

Sky Sport Italia-სა და იტალიის სხვა წყაროების ცნობით, ჩესკ ფაბრეგასის გუნდმა კაკერეტის განაცხადში შეყვანის თანხმობა ცოტა ხნის წინ მიიღო. ის ესპანელ გარემარბ ხესუს როდრიგესს შეცვლის.

როდრიგესმა სამშაბათს კუნთის ტრავმა მიიღო. ფაბრეგასმა თქვა, რომ 20 წლის ფეხბურთელი სამშაბათის ვარჯიშის ბოლო ბურთზე დარტყმისას დაშავდა.

ტრავმის გამო როდრიგესი მინიმუმ ორი თვის განმავლობაში ვერ ითამაშებს, რაც კომოს ჩემპიონთა ლიგის განაცხადის შეცვლის მოთხოვნის საშუალებას აძლევს.

კომომ მოთხოვნა სამშაბათს, დროულად შეიტანა, მომდევნო მატჩის დაწყებამდე სულ მცირე 24 საათით ადრე. კლუბმა ხესუს როდრიგესის ტრავმასთან დაკავშირებული დოკუმენტებიც წარადგინა და დაადასტურა, რომ ესპანელი მოედანზე დაბრუნებას ორ თვეზე ადრე ვერ შეძლებს.

დღეს დილით უეფამ კომოს ცვლილების შეტანის ნება დართო, ამიტომ კაკერეტი მანჩესტერ იუნაიტედთან მატჩში ხელმისაწვდომი იქნება. სავარაუდოდ, ის სათადარიგოთა სკამზე დაიწყებს.

ტრავმირებულები არიან ტრევო ჩალობა, ასან დიაო და მოიზე კინი. ამიტომ ფაბრეგასს დღევანდელ მატჩში მანჩესტერ იუნაიტედთან მოედნის მოთამაშეთა შორის მხოლოდ 16 ფეხბურთელი ეყოლება.