კომპანის გამოჯანმრთელებას კვირები დასჭირდება

ბაიერნის სპორტულმა დირექტორმა მაქს ებერლმა განაცხადა, რომ მთავარ მწვრთნელს, ვინსენტ კომპანის, „საკუთარი თავისგან დაცვა“ სჭირდება და გამოჯანმრთელებას კვირები დასჭირდება. კომპანი პარასკევს კლუბის საწვრთნელ ბაზაზე დაეცა.

მანჩესტერ სიტისა და ბელგიის ნაკრების ყოფილი მცველი, 40 წლის კომპანი, საავადმყოფოში რჩება და მისი მდგომარეობა „სტაბილურია“. ებერლის თქმით, „გამოკვლევები გრძელდება“.

ებერლმა დასძინა, რომ ბაიერნი განიხილავდა კვირას ფრაიბურგში გასამართი ბუნდესლიგის მატჩის გადადების თხოვნას. თუმცა, კლუბს მიაჩნდა, რომ კომპანისთვის საუკეთესო წამალი იქნებოდა, „ეთამაშა და წარმატებისთვის მიეღწია“.

ებერლმა თქვა: „ვინის იმდენ დროს მივცემთ, რამდენიც დასჭირდება. ვადების განსაზღვრას არ ვიწყებთ. ჯერ უნდა გავარკვიოთ, რა ხდება, შემდეგ კი მშვიდად განვიხილავთ, რამდენ ხანს გაგრძელდება გამოჯანმრთელება. დღეებზე კი არა, კვირებზე ვილაპარაკებთ. ეს ყველამ უნდა გავითვალისწინოთ“.

კომპანი საავადმყოფოში მას შემდეგ გადაიყვანეს, რაც კლუბის მეორე გუნდის ვარჯიშს ადევნებდა თვალს და დაეცა. ვირუსის გამო ის თავს შეუძლოდ გრძნობდა და სამშაბათს გამოტოვა ბაიერნისა და არსენალის ჩემპიონთა ლიგის მატჩის წინა პრესკონფერენცია.

კომპანი ოთხშაბათის მატჩისას მოედნის კიდესთან იდგა. ებერლმა იკითხა, ხომ არ „უნდა შეეჩერებინა ის უფრო ადრე“.

ებერლმა თქვა: „ფაქტია, მწვრთნელს ყველანაირად ვიცავთ. თუ მწვრთნელი ამბობს, რომ მზად არის რაღაც გააკეთოს, ჩვენ არ ვეტყვით, ამას არ დაგანებებთო, როცა არ ვიცით, რა ხდება. ყველას თავისი პასუხისმგებლობაც აქვს და უნდა თქვას: ახლა გაგრძელება აღარ შემიძლია.

ვინი ძალიან ბევრს შრომობს. თუ სხეულის ფაქიზ სიგნალებს არ მოუსმენ, საბოლოოდ ის ტკივილით აგატირებს. ახლა ვინის ამ დროს მივცემთ და კიდევ უფრო მეტად ვეცდებით, ვიდრე ადრე, საკუთარი თავისგან დავიცვათ“.

კომპანი მანჩესტერ სიტიში ფეხბურთელის რანგში 11 წელი თამაშობდა. მან ოთხჯერ მოიგო პრემიერ-ლიგა, ორჯერ ინგლისის თასი და ოთხჯერ ინგლისის ლიგის თასი, შემდეგ კი ბარნლის მწვრთნელი გახდა.

კომპანიმ ბარნლი 2022-23 წლების სეზონში ჩემპიონშიფის გამარჯვებამდე მიიყვანა, თუმცა „კლარეტსი“ პრემიერ-ლიგაში ვერ შეინარჩუნა. მან კლუბი დატოვა და 2024 წლის მაისში ბაიერნი ჩაიბარა. მისი ხელმძღვანელობით გუნდმა ბუნდესლიგა ზედიზედ ორჯერ მოიგო.

კომპანის თანაშემწე აარონ დენქსი საავადმყოფოში ბაიერნის მთავარ მწვრთნელს ესაუბრა.

დენქსმა თქვა: „ავუხსენი, რომ ფეხბურთზე არ ვისაუბრებდით. მხოლოდ მისი ჯანმრთელობის ამბავი მოვიკითხე და დავრწმუნდი, რომ კარგად იყო. საფეხბურთო საქმეები მთლიანად ჩვენს ხელშია და გუნდურად ვიმუშავებთ, რომ კლუბმა წინსვლა განაგრძოს“.