კრემლი ზავზე უარს ამბობს, ფონ დერ ლაიენი სანქციების გაგრძელებას აცხადებს

მოსკოვის პოზიცია უკრაინასთან ენერგეტიკულ ობიექტებზე დარტყმების შეჩერების შესახებ არ შეცვლილა. კრემლის პრესსპიკერმა დმიტრი პესკოვმა, რომელსაც ТАСС ციტირებს, განაცხადა, რომ რუსეთს ცეცხლის შეწყვეტა კი არა, მშვიდობა სჭირდება. ამ დროს პრეზიდენტი ვლადიმერ პუტინი სანქტ-პეტერბურგში აშშ-ის წარმომადგენელ სტივ უიტკოფს უნდა შეხვდეს.

უიტკოფი სანქტ-პეტერბურგში დილით ჩავიდა. პულკოვოს აეროპორტში მას რუსეთის პრეზიდენტის მრჩეველი კირილ დმიტრიევი დახვდა.

რუსეთის პრეზიდენტმა ვლადიმერ პუტინმა აშშ-ის წარმომადგენელ სტივ უიტკოფს აცნობა, რომ რუსეთში დაკავებული აშშ-ის მოქალაქე სტივენ ჰაბარდი გაათავისუფლეს. ამის შესახებ რუსული საინფორმაციო სააგენტოები იუწყებიან. პუტინის თქმით, ჰაბარდი პულკოვოს აეროპორტშია და სამშობლოში დაბრუნებას ელოდება. ჰაბარდის გათავისუფლება გუშინ აშშ-ის პრეზიდენტმა დონალდ ტრამპმა მოითხოვა.

SpaceX-ის თანამგზავრული კავშირის შენელებასთან დაკავშირებით, რომელსაც უკრაინა ბრძოლის ველზე ოპერაციების მხარდასაჭერად იყენებს, რუბიომ ასევე აღნიშნა, რომ პრეზიდენტ ტრამპს Starlink-ის, Starshield-ისა და ილონ მასკის გადაწყვეტილებებთან კავშირი არ აქვს. მისი თქმით, ეს კერძო კომპანიაა, პრეზიდენტი მას არ მართავს და მისთვის რაიმეს გაკეთების ბრძანება არ შეუძლია. რუბიომ დასძინა, რომ ამის შესახებ წინასწარ არაფერი იცოდნენ.

ამასობაში, უკრაინაში მსხვერპლი კვლავ არის. ხარკოვის ოლქში მცხოვრები ორი ხანდაზმული ადამიანი ღამით რუსეთის შეიარაღებული ძალების დრონებით თავდასხმის შედეგად დაიღუპა. დაღუპულები 81 წლის ქალი და 83 წლის კაცი იყვნენ. ისინი სოფელ კოროტიჩში ცხოვრობდნენ. ამის შესახებ ხარკოვის ოლქის გუბერნატორმა ოლეჰ სინეჰუბოვმა განაცხადა.

თავდასხმის შედეგად 13 კერძო სახლი და ერთი მანქანა დაზიანდა. იმავე ღამეს პოლტავის ოლქის ქალაქ კრემენჩუკში რუსული დრონი სკოლის შენობას დაეცა, ხანძარი გააჩინა და ერთი ადამიანი დაჭრა. რეგიონული გუბერნატორის, ვიტალი დიაკივნიჩის თქმით, დარტყმის სამიზნე მიხაილო ოსტროჰრადსკის ეროვნული უნივერსიტეტის სასწავლო შენობა გახდა. საგანგებო სამსახურები ხანძრის ჩასაქრობად მივიდნენ.

რუსეთის თავდასხმის შედეგად დღეს დილით კიევში კიდევ ორი ადამიანი დაიღუპა. დარტყმა სვიატოშინსკის რაიონში მდებარე 24-სართულიან საცხოვრებელ კორპუსს მოხვდა. ამის შესახებ Укрінформ-ი ადგილობრივ ხელისუფლებაზე დაყრდნობით წერს. თავდასხმის შემდეგ ცათამბჯენის მე-20 სართულზე მდებარე ბინაში ხანძარი გაჩნდა. ცეცხლი დაახლოებით 70 კვადრატულ მეტრზე გავრცელდა, ბინის კონსტრუქცია კი ნაწილობრივ დაინგრა.

რუსეთის ბრიანსკის ოლქის სოფელ კლიმოვოში უკრაინული დრონით თავდასხმისას 19 წლის ახალგაზრდა დაიღუპა, ორი 21 წლის ადამიანი კი დაიჭრა. დრონი ავტომობილს დაეცა. ამის შესახებ რეგიონის გუბერნატორმა ეგორ კოვალჩუკმა განაცხადა.