ლებრონ ჯეიმსის 76ers-მა სეზონის გახსნაზე ნიქსი დაამარცხა

ლებრონ ჯეიმსმა ფილადელფია 76ers-ში სადებიუტო მატჩში 14 ქულა მოაგროვა. გუნდმა NBA-ის სეზონის გახსნით შეხვედრაში მოქმედი ჩემპიონი ნიუ-იორკ ნიქსი დაამარცხა.

41 წლის ჯეიმსისთვის ეს ლიგაში რეკორდულად გახანგრძლივებული, 24-ე სეზონია. ზაფხულში ლოს-ანჯელეს ლეიკერსიდან გადასვლის შემდეგ ის კარიერაში მეოთხე გუნდში თამაშობს. ახალ გუნდს მან შვიდი შედეგიანი გადაცემაც გაუკეთა, 76ers-მა კი 106:100 გაიმარჯვა.

76ers-ის საუკეთესო მექულე ტაირის მაქსი გახდა, რომელმაც 28 ქულა ჩააგდო. ჯეილენ ბრაუნმა, რომელიც ფილადელფიის გუნდში ბოსტონ სელტიკსიდან პოლ ჯორჯის სანაცვლოდ ხმაურიანი გაცვლის შედეგად გადავიდა და გუნდში სადებიუტო მატჩი ჩაატარა, 19 ქულა, 8 მოხსნა და 6 შედეგიანი გადაცემა დააგროვა.

შეხვედრამდე ნიქსმა ჩემპიონობა იზეიმა და მედისონ სკვერ გარდენის ჭერქვეშ მესამე საჩემპიონო ბანერი აღმართა. ზეიმს ნიქსის ცნობილი გულშემატკივრები, ბენ სტილერი და სპაიკ ლი, ესწრებოდნენ.

ნიქსმა NBA-ის გასული სეზონის ფინალში სან-ანტონიო სპურსის დამარცხებით 53-წლიანი უჩემპიონო სერია შეწყვიტა. თუმცა სეზონის პირველი მატჩი ვერ მოიგო: 76ers-მა მესამე მეოთხედში მოპოვებული უპირატესობა შეინარჩუნა.

ნიქსის საუკეთესო მექულე ჯეილენ ბრანსონი გახდა, რომელმაც 21 ქულა ჩააგდო. კარლ-ენტონი თაუნსმა 19 ქულა და 12 მოხსნა მოაგროვა.

ჯეიმსმა მაუწყებელ NBC-ს უთხრა: „ბევრად უკეთ თამაში შემიძლია. ჯერ რიტმს ვეძებ. ახალ გუნდთან ერთად მხოლოდ ორ კვირაზე ოდნავ მეტია, რაც ვვარჯიშობ.

„თუმცა მომეწონა, როგორ ვითამაშეთ. ვფიქრობ, განსაკუთრებით დაცვაში, ძალიან კარგად გამოვიყურებოდით“.

NBA-ის 81-ე სეზონის გახსნით შეხვედრაში დეტროიტ პისტონსმა მეორე ტაიმში ჩამორჩენა აღმოფხვრა და ბოსტონ სელტიკსი 121:113 დაამარცხა.

კეიდ კანინგემმა და ჯეილენ დიურენმა 22-22 ქულა ჩააგდეს. დანკან რობინსონმა კი 21 ქულიდან 15 მეოთხე მეოთხედში მოიპოვა. მასპინძლებმა გამარჯვება 23:0-იანი მონაკვეთის წყალობით გაინაღდეს.

გასული რეგულარული სეზონის ორი საუკეთესო გუნდის შეხვედრაში სელტიკსის ახალწვეულმა პოლ ჯორჯმა თავის ახალ გუნდს 38 ქულა მოუტანა.

ღამის ბოლო შეხვედრაში ზედიზედ ორჯერ NBA-ის ყველაზე ღირებულ მოთამაშედ დასახელებულმა შაი გილჯეს-ალექსანდერმა ოკლაჰომა-სიტი თანდერის შემადგენლობაში 32 ქულა ჩააგდო. თანდერმა სან-ანტონიო სპურსი 116:104 დაამარცხა.

სპურსის საუკეთესო მექულე სტეფონ კასლი გახდა, რომელმაც 24 ქულა ჩააგდო. მისმა გუნდმა ვერ გაიმეორა ის თამაში, რომლის წყალობითაც გასული სეზონის დასავლეთ კონფერენციის ფინალში მოქმედი ჩემპიონი თანდერი დაამარცხა.