ლილი სანტოსის ტრავმის გამო სამართლებრივ დავას განიხილავს

24 წლის სანტოსი საკაცით გაიყვანეს. მას წინა ჯვარედინი იოგი გაუწყდა და მარჯვენა მუხლის მენისკიც დაუზიანდა.

ლილის მიერ საბოლოოდ 1:0 მოგებული მატჩის პირველ ტაიმში სანტოსის წინააღმდეგ ლე ავრის ნახევარმცველმა ამირ რიჩარდსონმა იუხეშა. მსაჯმა ჯარიმა დანიშნა, თუმცა რიჩარდსონს არც ყვითელი და არც წითელი ბარათი არ მიუღია.

ლილმა განაცხადა, რომ ლიგას ინციდენტის სადისციპლინო კომიტეტისთვის გადაცემა სთხოვა. კლუბის აზრით, რიჩარდსონი წითელ ბარათს იმსახურებდა, რადგან ვარდნა „უკნიდან, უკონტროლოდ და სახიფათოდ“ შეასრულა.

კლუბის განცხადებაში წერია: „თავად ტრავმის გარდა, კლუბში სერიოზულ კითხვებს იწვევს გარემოებები, რომლებშიც ის მოხდა, და სანქციის არარსებობა“.

ვარსკვლავი ლუის ენრიკეა: როგორ აპირებს პარი სენ-ჟერმენი ლიდერობის შენარჩუნებას

ლილმა განაცხადა: „LOSC-მა საკითხი საფრანგეთის ფეხბურთის ფედერაციასა და პროფესიული ფეხბურთის ლიგას გადასცა, რათა მათ მსაჯთა გუნდისა და ვიდეოასისტენტების მიერ ეპიზოდის შეფასება შეისწავლონ.

LOSC შესაძლო სამართლებრივ გზებს სწავლობს და იტოვებს უფლებას, ზიანის ანაზღაურების მისაღებად ნებისმიერ სამართლებრივ ზომას მიმართოს“.

კლუბის ცნობით, სანტოსი „რამდენიმე თვის“ განმავლობაში თამაშს ვერ შეძლებს.

ლე ავრმა საპასუხოდ განაცხადა, რომ კლუბმა და რიჩარდსონმა სანტოსს გამოჯანმრთელების პროცესში მხარდაჭერა გამოუცხადეს. თუმცა კლუბმა მატჩის მთავარი მსაჯისა და ვიდეოასისტენტი მსაჯის გადაწყვეტილება დაიცვა.

ლე ავრმა ასევე ეჭვქვეშ დააყენა ლილის მცდელობა, „მისი ფეხბურთელი მომხდარის შემდეგ დასაჯოს, რადგან ასეთი გადაწყვეტილება მოქმედი რეგულაციების ფარგლებს გასცდებოდა“.

ლე ავრმა დასძინა: „HAC ლიგა 1-ის ყველა სხვა კლუბს პატივს სცემს და სანაცვლოდ იმავეს მოელის“.

ბი-ბი-სის სპორტის რედაქციამ კომენტარისთვის საფრანგეთის პროფესიული ლიგების მმართველ პროფესიული ფეხბურთის ლიგას (LFP) მიმართა.

ლილი ლიგა 1-ში მეორე ადგილზეა და სამშაბათს ჩემპიონთა ლიგაზე არსენალს შეხვდება.