მალენმა „კომოსთან“ უხეში ვარდნისთვის წითელი ბარათი მიიღო

სერია A-ს მიმდინარე სეზონის საუკეთესო ბომბარდირი მალენი „კომოსთან“ გასვლით მატჩში 53-ე წუთზე გააძევეს.

ნიდერლანდელი თავდამსხმელი ბურთისთვის ხაკობო რამონს ებრძოდა და ფეხბურთელები ერთმანეთს მაისურებზე ექაჩებოდნენ. როცა ბურთი მათგან წავიდა, მალენმა მისი დაბრუნება სცადა. თუმცა იგი მოუხერხებლად ჩასრიალდა, ფეხი გაშლილი დატოვა და მეტოქისკენ კოტებით წავიდა.

მსაჯ მაიკლ ფაბრის VAR-ის ჩარევაც არ დასჭირვებია. მან მალენს რამდენიმე წამში პირდაპირი წითელი ბარათი უჩვენა.

DAZN-ის მსაჯთა ექსპერტმა ლუკა მარელიმ ეპიზოდი პირდაპირ ეთერში შეაფასა და გადაწყვეტილებას დაეთანხმა: „წითელი ბარათის ჩვენება სწორი გადაწყვეტილება იყო. მართალია, იგი ბურთს ფეხით ოდნავ შეეხო, მაგრამ მეტოქისკენ დაუფიქრებლად, კოჭის ზემოთ აწეული ფეხით, გამართული მუხლითა და სიჩქარით წავიდა. ჩემი აზრით, გადაწყვეტილება სწორი იყო“.

„რომას“ მთავარმა მწვრთნელმა ჯან პიერო გასპერინიმ გადაწყვეტილება მოედნის კიდესთან გააპროტესტა. მას სათადარიგოთა სკამზე მყოფი „რომას“ ფეხბურთელებიც შეუერთდნენ.

DAZN-ის მოედნისპირა რეპორტიორმა დავიდე ბერნარდიმ თქვა, რომ მოედნიდან ნიდერლანდელი თავდამსხმელის გასვლისას მალენმა და სათადარიგოთა სკამთან მყოფმა „რომას“ ფეხბურთელებმა მეოთხე ოფიციალურ პირს ერთი და იგივე უთხრეს: „მანამდე ყოველთვის ჯარიმაა“.

მალენი დარწმუნებულია, რომ რამონთან ორთაბრძოლისას მსაჯს მის სასარგებლოდ ჯარიმა უნდა დაენიშნა. თუმცა მსაჯმა თამაში გააგრძელა, შემდეგ კი ნიდერლანდელი უხეში ვარდნისთვის დასაჯა.

საინტერესოა, რომ რამდენიმე წუთის შემდეგ ფაბრიმ ტრავმა მიიღო. მატჩის დარჩენილ მონაკვეთში იგი მეოთხე ოფიციალურმა პირმა სიმონე სოცამ შეცვალა.