მანჩესტერ იუნაიტედის ხელმძღვანელობა კერიკის მომავალზე კრიზისულ შეხვედრას მართავს

კერიკის თანამდებობა საფრთხეშია ბორნმუთთან შინ 0:3 დამარცხების შემდეგ

ჰაუ ფეხბურთის დირექტორის, ჯეისონ უილკოქსის, მთავარი კანდიდატია

მანჩესტერ იუნაიტედის ხელმძღვანელობა კრიზისულ შეხვედრაზე განიხილავს, გაათავისუფლოს თუ არა მთავარი მწვრთნელი მაიკლ კერიკი. კვირას, „ოლდ ტრაფორდზე“, ბორნმუთთან მორიგი მძიმე მარცხის შემდეგ მისი თანამდებობა საფრთხეშია.

კერიკმა 0:3 დამარცხების შემდეგ მტკიცე პოზიცია დაიკავა და თქვა, რომ თანამდებობიდან გათავისუფლებას არ ელოდა. „სიტუაცია სრულად მესმის. სიმართლე რომ ვთქვა, რაიმე კონკრეტულს არ ველი. ჩვეულ რეჟიმში ვაგრძელებ მუშაობას და ეს ადგილი მიყვარს“, თქვა კერიკმა საკუთარი მომავლის შესახებ.

თუმცა, „გარდიანის“ ინფორმაციით, „იუნაიტედის“ ხელმძღვანელობა მის გათავისუფლებას აქტიურად განიხილავს. კლუბში ელიან, რომ კერიკს თანამდებობიდან გაათავისუფლებენ.

თუ მთავარი მწვრთნელი შეიცვლება, ედი ჰაუ კვლავ ჯეისონ უილკოქსის, „იუნაიტედის“ ფეხბურთის დირექტორის, სასურველი კანდიდატია. „ნიუკასლის“ ყოფილ მწვრთნელს პრემიერ-ლიგაში დიდი გამოცდილება აქვს, რაც მას სხვა შესაძლო კანდიდატებზე წინ აყენებს.

ჰაუს მოწვევა უნაი ემერის მოყვანაზე ნაკლები დაჯდებოდა. ემერი კიდევ ერთი სასურველი კანდიდატია, თუმცა „ასტონ ვილა“ ესპანელის სანაცვლოდ დაახლოებით 20 მილიონ ფუნტს მოითხოვდა.

ჯულიან ნაგელსმანს, გერმანიის ნაკრებისა და „ბაიერნის“ ყოფილ მთავარ მწვრთნელს, კრისტოფერ ვიველი, „იუნაიტედის“ რეკრუტინგის ხელმძღვანელი, მაღალ შეფასებას აძლევს. თუმცა, შესაძლოა, სერ ჯიმ რეტკლიფისთვის, რომელიც კლუბში საფეხბურთო პოლიტიკას აკონტროლებს, უილკოქსის აზრს მეტი წონა ჰქონდეს. შესაძლო კანდიდატებს შორის შეიძლება ანტონიო კონტეც იყოს.

კერიკმა ბრუნო ფერნანდეში ძირითად შემადგენლობაში არ დააყენა. მატჩის დაწყებამდე მან განმარტა, რომ გადაწყვეტილება საფეხბურთო მიზეზებით მიიღო და არა იმის გამო, რომ კაპიტანმა „კომოსთან“ ჩემპიონთა ლიგის შუა კვირის მატჩში მარცხის შემდეგ მისი ტაქტიკა გააკრიტიკა.

კერიკმა თქვა: „ყოველთვის იმას გავაკეთებ, რაც ჩემი აზრით, საფეხბურთო კლუბისთვის საუკეთესო იქნება, როგორი გადაწყვეტილებაც უნდა მივიღოთ. ასე რომ, სწორედ ესაა. არც ერთ შემთხვევაში არაფერს ველი“.

„ეს რთული ვითარებაა და ამის დამალვას აზრი არ აქვს. სინამდვილეში არ ვიცი, როგორ ჩანს ეს ყველაფერი და რა იქნება შემდეგ. კლუბისთვის ყოველთვის ყველაფერს გავაკეთებ და ამას ახლა არ შევცვლი. მიყვარს ის, რასაც ვაკეთებ, და პასუხისმგებლობას ვგრძნობ. უნდა დაველოდოთ და ვნახოთ“.