მელანია ტრამპმა ოლეშკიში ცეცხლის შეწყვეტას მიაღწია, აცხადებს თეთრი სახლი

გასულ თვეში ოლეშკის დარჩენილმა მცხოვრებლებმა ბი-ბი-სის მძიმე ამბები უამბეს იმის შესახებ, თუ როგორ გადარჩენას ცდილობდნენ მუდმივად დაბომბილ ქალაქში, სადაც საკვები და წყალი არ იყო.

მათი თქმით, ოლეშკის დიდ ტერიტორიაზე დარჩენილი ბავშვები არასრულფასოვანი კვებით იტანჯებოდნენ, სამედიცინო მომსახურება არ ჰქონდათ და განათლების მიღების შესაძლებლობის გარეშე „დეგრადირდებოდნენ“.

ბევრმა ბი-ბი-სის უთხრა, რომ ნაწილობრივ მოქმედებდა მხოლოდ ერთი საავადმყოფო, რომელიც კვირაში რამდენიმე დღეს იხსნებოდა და გადაუდებელ ამპუტაციებს ატარებდა.

უკრაინის საგარეო საქმეთა მინისტრის, ანდრიი სიბიჰას თქმით, ადგილობრივი მოსახლეობა რუსეთის ძალების მიერ დაწესებულ „სრულ ბლოკადაში“ ცხოვრობდა.

უკრაინის განცხადებით, მას რაიონში მარაგების შეტანა სცადა, თუმცა ბოლო თვეებში წარმატებას ვერ მიაღწია.

კრემლმა სექტემბერში აღიარა, რომ ოლეშკიში „კრიტიკული ვითარება“ და „საკვებისა და მედიკამენტების მომარაგების პრობლემები“ იყო. თუმცა დაამატა, რომ „რუსეთის სამხედროები მათ მოგვარებაზე მუშაობდნენ“, და პასუხისმგებლობა კიევს დააკისრა.

ქალაქში ცეცხლის შეწყვეტისკენ მოწოდებებს შორის რომის პაპიც იყო. მან „დიალოგისა და მშვიდობისკენ“ მოუწოდა.

რუსეთის სრულმასშტაბიან შეჭრამდე ოლეშკიში 24 000 ადამიანი ცხოვრობდა. უკრაინის შეფასებით, ახლა ქალაქსა და მის შემოგარენში დაახლოებით 6 000 ადამიანი რჩება, მათ შორის 200 ბავშვი.

ოლეშკი იმ დასახლებებს შორისაცაა, სადაც 2023 წელს ნოვა კახოვკის კაშხლის ჩამონგრევით გამოწვეულმა მასშტაბურმა წყალდიდობამ ათასობით ადამიანს სახლი დაუნგრია. უკრაინამ და მისმა მოკავშირეებმა კაშხლის აფეთქებაში რუსეთი დაადანაშაულეს, რუსეთმა კი პასუხისმგებლობა უკრაინას დააკისრა.

აშშ-ის პირველი ლედი ზოგიერთ წინამორბედთან შედარებით ნაკლებად ჩანს საჯაროდ და თეთრი სახლის ღონისძიებებზეც მხოლოდ ხანდახან ჩნდება. თუმცა ის რუსეთ-უკრაინის ომით გამოწვეული ჰუმანიტარული პრობლემების მოგვარებაში ჩაერთო.

2025 წლის აგვისტოში მელანია ტრამპმა პუტინს წერილი მისწერა და უთხრა, რომ „მსოფლიოში ბავშვებისა და მომავალი თაობების დაცვის დროა“.

მელანია ტრამპს უკრაინა სახელით არ უხსენებია, თუმცა რამდენიმე დღის შემდეგ, თეთრ სახლში, ზელენსკიმ მას თავისი მეუღლის, ოლენას წერილი გადასცა, რომელშიც ის ბავშვების დასაცავად გაწეული ძალისხმევისთვის მადლობას უხდიდა.

იმავე წლის ოქტომბერში, იშვიათ საჯარო გამოსვლაზე, აშშ-ის პირველმა ლედიმ თქვა, რომ პუტინმა მას წერილობით პირდაპირ უპასუხა. მისი თქმით, წარმომადგენლები რუსეთის პრეზიდენტის გუნდთან მუშაობდნენ, რათა უკრაინელი ბავშვები რუსეთიდან და, პირიქით, რუსეთიდან უკრაინაში დაებრუნებინათ.

გავრცელებული ცნობებით, 2025 წლიდან 34 ბავშვი დააბრუნეს, მათ შორის ხუთი მიმდინარე წლის ივლისში.

აშშ-ის პრეზიდენტ დონალდ ტრამპის თქმით, მისი მეუღლე პუტინისა და მშვიდობის მიღწევის სურვილის მიმართ პირად საუბრებში სკეპტიციზმს გამოთქვამდა.

ტრამპმა გასული წლის ივლისში თქვა: „სახლში მივიდოდი და პირველ ლედის ვეუბნებოდი: „ვლადიმირთან შესანიშნავი საუბარი მქონდა. მგონი, ყველაფერი დასრულდა““.

„მერე ტელევიზორს ჩავრთავდი, ან ის ერთხელ მეტყოდა: „რა უცნაურია, მათ ხომ ახლახან მოხუცთა თავშესაფარი დაბომბეს““։

თემებიანდრიი სიბიჰადავით არახამიავლადიმერ პუტინივოლოდიმირ ზელენსკიმელანია ტრამპითეთრი სახლიმდინარე დნიპრიოლეშკირუსეთიუკრაინა

გამოქვეყნდა 24 ოქტომბერი, 2026