მესი არგენტინის ნაკრებში გამოსამშვიდობებელი მატჩისთვის გამოიძახეს

არგენტინის ფეხბურთის ფედერაციის პრეზიდენტმა კლაუდიო ტაპიამ დაადასტურა, რომ 6 ოქტომბრის მატჩი მესის მიეძღვნება. ნაკრებიდან წასვლის გამოცხადების შემდეგ, თავდამსხმელს სათანადოდ გააცილებენ.

ტაპიამ ვიდეოგანცხადებაში თქვა: „არგენტინის ყველა გულშემატკივარს მინდა გითხრათ, რომ ნაკრების მთავარ მწვრთნელ ლიონელ სკალონისთან საუბრის შემდეგ გადავწყვიტეთ, მსოფლიოს საუკეთესო ფეხბურთელი, ჩვენი ნაკრების სიმბოლო და კაპიტანი, ლიონელ ანდრეს მესი მოვიწვიოთ. გვინდა, მან 6 ოქტომბერს, აქ, არგენტინაში, ის დამშვიდობება მიიღოს, რომელსაც ნამდვილად იმსახურებს“.

მან დასძინა: „ამასთანავე, მას შემდეგ, რაც ლიონელმა მოწვევა მიიღო, გადავწყვიტეთ, 2022 წლის მსოფლიო ჩემპიონატის ყველა ის გამარჯვებული მოვიწვიოთ, ვინც მასთან ერთად კატარში თამაშობდა. მათ ოჯახებსაც მოვიწვევთ, რათა ამ დაუვიწყარ მატჩში მას შეუერთდნენ. ყველა არგენტინელსა და ნაკრების გულშემატკივარს მოვუწოდებთ, მსოფლიოს საუკეთესო ფეხბურთელის „უკანასკნელ ტანგოს“ უყურონ“.

მესიმ სანაკრებო კარიერის დასრულება 31 აგვისტოს Instagram-ზე გამოქვეყნებული პოსტით გამოაცხადა. მან არგენტინის ნაკრებში 207 მატჩში 125 გოლი გაიტანა. მესი ნაკრებს ისტორიაში საუკეთესო ბომბარდირისა და ყველაზე მეტი მატჩის ჩამტარებელი ფეხბურთელის სტატუსით ტოვებს.

არგენტინა 30 სექტემბერს ბოლივიას, ხოლო 3 ოქტომბერს ბურკინა-ფასოს დაუპირისპირდება. ამის შემდეგ ნაკრები მონუმენტალზე ბენინს უმასპინძლებს.

როდრიგო დე პაული და ჯოვანი ლო ჩელსოც არგენტინის ნაკრებს მხოლოდ ბენინთან მატჩისთვის შეუერთდებიან, თუმცა ისინი საერთო შემადგენლობაშიც შეიყვანეს.