Meta ხელოვნურ ინტელექტზე ხარჯების ზრდის ფონზე 25 მილიარდ დოლარამდე ობლიგაციების გაყიდვას გეგმავს

Meta სამშაბათს ობლიგაციების გაყიდვით 20-დან 25 მილიარდ დოლარამდე მოზიდვას ცდილობს. კომპანია ხელოვნური ინტელექტის ინფრასტრუქტურაზე, მოდელებსა და სერვისებზე ხარჯებს ზრდის.

გარიგების შესახებ ინფორმირებული წყაროების ცნობით, რომელთაც პირად საკითხებზე საუბრის გამო ვინაობის გამხელა არ ისურვეს, ვალის ორი მესამედი აშშ დოლარში იქნება, ერთი მესამედი კი ევროში. წყაროების თქმით, ობლიგაციების საბოლოო ფასი სამშაბათს, დღის მეორე ნახევარში განისაზღვრება.

Meta-მ კომენტარის გაკეთებაზე უარი თქვა. Meta-ს გეგმების შესახებ ინფორმაცია პირველად ბლუმბერგმა გაავრცელა.

Meta ობლიგაციებს რამდენიმე დღეში ყიდის მას შემდეგ, რაც S&P Global Ratings-მა კომპანიის პროგნოზი „AA- სტაბილურიდან“ „AA- ნეგატიურამდე“ შეცვალა. სააგენტომ მიზეზად კაპიტალური ხარჯების დიდი მოცულობისა და უარყოფითი თავისუფალი ფულადი ნაკადების გარშემო არსებული „გაურკვევლობა“ დაასახელა.

გასულ თვეში გამოქვეყნებულ მესამე კვარტლის ფინანსურ ანგარიშში Facebook-ის მფლობელმა Meta-მ განაცხადა, რომ მთელი წლის კაპიტალური ხარჯები 135-დან 145 მილიარდ დოლარამდე იქნება. ეს წინა პროგნოზის ქვედა ზღვარზე 5 მილიარდი დოლარით მეტია. უახლეს კვარტალში Meta-ს თავისუფალი ფულადი ნაკადები 2,12 მილიარდი დოლარით უარყოფითი იყო. უარყოფითი მაჩვენებელი Alphabet-მა და Amazon-მაც გამოაქვეყნეს.

აპრილში ობლიგაციების გაყიდვით Meta-მ 25 მილიარდი დოლარი მოიზიდა. კომპანიამ გასულ კვირას განაცხადა, რომ ხელოვნური ინტელექტის ინიციატივების დასაფინანსებლად 95 მილიარდი დოლარის მოზიდვას გეგმავს. თავდაპირველად Meta საჯარო შეთავაზებებით 35 მილიარდი დოლარის კაპიტალის მოზიდვას აპირებს, ხოლო დამატებით 60 მილიარდ დოლარს ბაზარზე პერიოდული გაყიდვების პროგრამით მოიზიდავს.

სამშაბათს Meta-ს აქციები 2,7%-ით გაიზარდა. მანამდე აქციების ფასი ბოლო 14 სავაჭრო სესიიდან 12-ში დაეცა, ოქტომბერი კი ბოლო ოთხი წლის ყველაზე ცუდი თვიური შედეგით დაასრულა.