Meta-ს ახალი პირობები მედიასაიტებზე ხელოვნური ინტელექტის გაწვრთნას დაუშვებს

ახალი პოლიტიკა იმ ბიზნესანგარიშებზე ვრცელდება, რომლებიც საკუთარ მასალას Facebook-ზე, Instagram-ზე, WhatsApp-სა და Messenger-ზე ავრცელებენ. Nieman Lab-ის ცნობით, ეს პირობები Meta-ს, შესაძლოა, სალიცენზიო შეთანხმების გვერდის ავლით ონლაინგამომცემლების მასალაზე ხელოვნური ინტელექტის მოდელების გაწვრთნის საშუალებას აძლევდეს. Meta-მ OpenAI-ს მიბაძა და ხელოვნური ინტელექტის სფეროში სალიცენზიო შეთანხმებები CNN-თან, Fox News-თან, USA Today-სა და People Inc.-თან გააფორმა. თუმცა, ახალი პირობებით კომპანიამ შეიძლება ბევრად მეტი მასალა მიიღოს:

„თქვენ უფლებას გვაძლევთ, ჩვენ ან ჩვენი სახელით მოქმედმა ნებისმიერმა სუბიექტმა ავტომატიზებული პროგრამული უზრუნველყოფა გამოიყენოს. ეს მოიცავს ვებმონაცემების შემგროვებლებს, ბოტებს, რობოტებს, სპაიდერებს, კროულერებსა და მომხმარებლის აგენტებს. ასევე შეგვიძლია სატესტო ანგარიშები შევქმნათ და თქვენს პროდუქტებსა თუ მომსახურებასთან დაკავშირებულ დომენებზე, ვებგვერდებსა და URL-ებზე წვდომა მივიღოთ. უფლება გვაქვს, ისინი და მათზე ხელმისაწვდომი მასალა დავაინდექსოთ, დროებით შევინახოთ, გავაანალიზოთ, შევაგროვოთ, მოვიძიოთ ან ავტომატურად დავათვალიეროთ. იგივე ეხება მასალას, რომელიც Meta-ს პროდუქტებისა და მომსახურების თქვენ მიერ ან მომხმარებლების მიერ გამოყენების შედეგად ხელმისაწვდომი ხდება. ამ დომენებიდან, ვებგვერდებიდან ან URL-ებიდან განახლებების პერიოდულად მიღებაც შეგვიძლია. Meta-ს შეუძლია იქ არსებული ნებისმიერი მასალა გამოიყენოს Meta-ს პროდუქტების, მომსახურებისა და ფუნქციების მისაწოდებლად, შესაქმნელად, გასაუმჯობესებლად, გამოსაკვლევად, გასაწვრთნელად და მათი მთლიანობის შესანარჩუნებლად. ეს უფლებამოსილება წინამდებარე კომერციული პირობებითა და სხვა შესაბამისი დამატებითი პირობებით გათვალისწინებულ პროდუქტებს, მომსახურებასა და ფუნქციებს ეხება“.

პირობების თანახმად, ბიზნესებს, რომლებიც Meta-ს ახალ პოლიტიკას არ ეთანხმებიან, შეუძლიათ „ბიზნესის ან კომერციული მიზნებისთვის ჩვენს პროდუქტებზე წვდომა ან მათი გამოყენება სრულად შეწყვიტონ“. გასულ თვეში Meta-მ ახალი გამოწერა, Meta One, გამოუშვა. ის ბიზნესებისა და კონტენტის შემქმნელებისგან პოსტებსა და მოკლე ვიდეოებში ბმულების დასამატებლად საფასურის გადახდას მოითხოვს. Nieman Lab-მა განაცხადა: „სხვაგვარად რომ ვთქვათ, Meta-მ მომხმარებლებისგან იმავე მასალაზე ბმულების გამოქვეყნებისთვის საფასურის აღება დაიწყო, რომლის უფასოდ ავტომატურად შეგროვების ნებართვაც ექნება“.

Meta-მ ვერჯის (The Verge) კომენტარის მოთხოვნას დაუყოვნებლივ არ უპასუხა.