Microsoft ახალი Azure Maia სისტემების მრავალგიგავატიან დანერგვას გეგმავს

Microsoft-მა ახალი თაობის სპეციალურად შექმნილი Azure Maia ხელოვნური ინტელექტის ჩიპები წარადგინა. კომპანიის განცხადებით, ისინი გამოთვლითი ინფრასტრუქტურის ახალ ეტაპს შექმნიან. ამ ინფრასტრუქტურაში აგენტური დასკვნის მოთხოვნების დასაკმაყოფილებლად ყველა კომპონენტი მჭიდროდ იქნება ინტეგრირებული.

კომპანიის ცნობით, Azure Maia 200, რომელიც წელს წარადგინეს, უკვე საწარმოო ამოცანებს ასრულებს. Microsoft მის მომდევნო ვერსიას 2027 წლისთვის გეგმავს.

Microsoft Azure Maia 300-ს „სრულ ინტელექტუალურ სისტემად“ აღწერს, რომელიც დღეს წარმოქმნილი ახალი ტიპის ხელოვნური ინტელექტის ამოცანებისთვის შეიქმნა. კომპანიის მტკიცებით, 96 ამაჩქარებლისგან შემდგარი სრული კონფიგურაცია Maia 200-თან შედარებით ერთ სტელაჟზე ტოკენების შვიდჯერ მეტ გამტარუნარიანობას უზრუნველყოფს. ამასთან, წამყვან, გრაფიკულ პროცესორებზე დაფუძნებულ სისტემებთან შედარებით, ის თითო მეგავატზე 40%-ით მეტ ტოკენს დაამუშავებს.

Microsoft-ის ღრუბლოვანი სერვისებისა და ხელოვნური ინტელექტის აღმასრულებელმა ვიცე-პრეზიდენტმა სკოტ გათრიმ ბლოგპოსტში დაწერა, რომ ახალი თაობის ჩიპი დასკვნის გამოტანაზე ორიენტირებული არქიტექტურით შეიქმნა. ის გრძელ კონტექსტზე, მეხსიერების ინტენსიურ გამოყენებასა და დეკოდირების დიდ დატვირთვაზე გათვლილი ამოცანებისთვისაა ოპტიმიზებული.

კომპანია მის გამოყენებას სტელაჟის მასშტაბის სისტემებში გეგმავს, რომლებშიც მაქსიმუმ 96 ამაჩქარებელი იქნება. თითოეულ Maia 300-ს რვა HBM4 მეხსიერების პაკეტი ექნება, რომელთა მაქსიმალური გამტარუნარიანობა 18 ტბ/წმ-ს მიაღწევს. ეს დიდი მოდელებისა და გრძელკონტექსტიანი ამოცანების შესრულებას შეუწყობს ხელს.

სისტემა Nvidia-ს მიერ საკუთარი გრაფიკული ამაჩქარებლებისთვის უკვე შექმნილ, სტელაჟის მასშტაბის ხელოვნური ინტელექტის მოწყობილობებს ჰგავს. მსგავს ინფრასტრუქტურაზე AMD-მაც იმუშავა და Helion და Helios შექმნა. ყველა მათგანი შესაბამისი ჩიპებისა და პროგრამული სისტემების შესაძლებლობების მაქსიმალურად გამოსაყენებლადაა შექმნილი.

Microsoft-ის განცხადებით: „Maia 300 სრულ სისტემადაა აგებული. პროგრამული უზრუნველყოფა, ჩიპები, სტელაჟის ფიზიკური ინფრასტრუქტურა, ქსელები და მონაცემთა ცენტრები ერთობლივადაა დაპროექტებული, რათა ღრუბლოვანი მასშტაბის აგენტური დასკვნის მოთხოვნების დასაკმაყოფილებლად ერთიან პლატფორმად იმუშაოს“.

კომპანია ამტკიცებს, რომ სისტემური მიდგომა აგენტური ამოცანებისთვის აუცილებელია. ასეთი ამოცანები მრავალეტაპიან შესრულებას, გრძელი კონტექსტის დეკოდირებასა და ხელსაწყოების გამოყენებას მოიცავს. Microsoft-ის თქმით, ისინი „დასკვნის გამოთვლით პროფილსა და არითმეტიკულ ინტენსივობას ცვლიან“.