Muse მომხმარებლების ახლობლებზე დეტალურ ფაილებს ადგენს

დოკუმენტების თანახმად, Muse თავდაპირველად ადამიანებისთვის ცარიელ ფაილებს ქმნის, რომლებსაც დროთა განმავლობაში ინფორმაციით ავსებს. მონაცემები, სავარაუდოდ, ნაწილდება რუბრიკებად: „ფაქტები“, „ისტორია“, „ურთიერთობა“, „საერთო მახასიათებლები“, „ღია საკითხები“ და „გაძლიერება“. Meta-ს მითითებებში წერია, რომ Muse-მა მხოლოდ მისთვის ხელმისაწვდომი ინფორმაცია უნდა გამოიყენოს. გამოგონილი დეტალები ცარიელ გვერდზე უარესადაა შეფასებული.

როგორც ჩანს, „ფაქტების“ ნაწილში სისტემა პირად მონაცემებს აღრიცხავს. მათ შორისაა სახელები, დაბადების თარიღები, მისამართები და პროფესია. აქვე უნდა ინახებოდეს ისეთი თარიღები, რომლებიც ამ ადამიანისთვის მნიშვნელოვანია. სენტ-გალენის უნივერსიტეტის მიერ აღწერილი ფაილების თანახმად, Muse ამ ნაწილში სხვა ინფორმაციასაც აგროვებს. კერძოდ, რამდენად ხშირად ეკონტაქტება ადამიანი მომხმარებელს და როდის შედგა ბოლო კონტაქტი.

დოკუმენტების მიხედვით, Muse-ს „ისტორიის“ ნაწილისთვის შემდეგი მითითება აქვს: მან უნდა შეინახოს „რა მოხდა, მტკიცებულებების თარიღების მიხედვით: როგორ გაიცნეს ერთმანეთი, მარტის მოგზაურობა, მოგვარებული კამათი, გასული კვირის მნიშვნელოვანი მოვლენა“.

Muse-ის სავარაუდო ინსტრუქცია ურთიერთობის დეტალების აღრიცხვასაც პირდაპირ მოითხოვს. მაგალითად: „რამდენად ახლოს არიან ისინი, რას ეფუძნება ურთიერთობა, როგორ ექცევიან ერთმანეთს და რა სჭირდება მას ამჟამად“. აქვე უნდა ინახებოდეს, როგორ ჯობს ამ ადამიანთან ურთიერთობა და რას დაჰპირდა მას მომხმარებელი წარსულში.

დოკუმენტების თანახმად, მომხმარებლის გარემოცვის შესახებ ეს ანგარიშები ყოველ საათში ახლდება. სავარაუდოდ, მათში შეტყობინებები, ფოტოები და მეხსიერებაში შენახული სხვა მასალები ხვდება. მრავალი მინიშნება აჩვენებს, რომ Muse ნაცნობების შესახებ Meta-ს სივრცეში დაცულ მონაცემებსაც იყენებს. ამ სივრცეში, სხვებთან ერთად, Facebook და Instagram შედის.

ჯოშიმ უაირდს (Wired) განუცხადა: „ყველა ამ მოთხოვნის, სისტემის შესაძლებლობების შესახებ მონაცემებისა და იმ ინფორმაციის საფუძველზე, რომელსაც ისინი Muse-ში ტვირთავენ, ჩემი შთაბეჭდილებაა, რომ მათ ნამდვილ ადამიანებთან თქვენი ურთიერთობების გაგება სურთ“. მკვლევარმა დასძინა: „ისინი ცდილობენ, მეგობარივით გაგიცნონ, რაც, სიმართლე რომ ვთქვა, საკმაოდ შემზარავია“.

ფაილები იმასაც აჩვენებს, რომ ჩატის ჩანაწერები, სავარაუდოდ, მაშინაც ინახება, როცა მომხმარებელი ღილაკს „დავიწყება“ აჭერს. გარდა ამისა, გაურკვეველი მოცულობის ინფორმაცია მომხმარებლის პირად სივრცეს ტოვებს. დავიწყების ფუნქციის ინსტრუქცია რამდენიმე ადგილს ასახელებს, სადაც ინფორმაცია მაინც შეიძლება დარჩეს. მათ შორისაა „მომხმარებლის მეხსიერების ცენტრალურად გამოქვეყნებული ჩაშენებული წარმოდგენა“, „Fleet Learning-ის გამომავალი კალათები“, „ცენტრალურად გამოქვეყნებული გაკვეთილები“, Community „Discovery Pool-ის“ ბარათები და ტელემეტრიის სისტემები. Muse, როგორც ჩანს, იმ ინფორმაციასაც იყენებს, რომელიც Instagram-მა მომხმარებლის ინტერესების შესახებ შეინახა. ამის შემდეგ სისტემა იღებს მითითებას, რომ ეს მომხმარებელს არ ახსენოს.