OpenAI-ის თანამშრომელი მოსასმენი მოწყობილობის დამონტაჟებისთვის დააკავეს

OpenAI-მ ინციდენტის შესახებ გამოქვეყნებულ განცხადებაში აღნიშნა: „ჩვენი ხელოვნური ინტელექტის მოდელები მოწყობილობის შესასწავლად და მისი წარმომავლობის დასადგენად გამოვიყენეთ. ასე გამოვავლინეთ კონკრეტული თანამშრომელი, რომელმაც ის რამდენიმე დღით ადრე დაამონტაჟა“.

იუსტიციის დეპარტამენტის ცნობით, OpenAI-მ მოწყობილობა ხელმძღვანელთა შეხვედრების ოთახში, ტელევიზორის USB-პორტში შეერთებული აღმოაჩინა. ამ ოთახში ხშირად განიხილავენ „უაღრესად კონფიდენციალურ ტექნიკურ, კომერციულ და სტრატეგიულ ინფორმაციას“.

ალფოზანს ამ ოთახში შესვლის უფლება არ ჰქონდა. თუმცა, იუსტიციის დეპარტამენტის ცნობით, სათვალთვალო კამერების ჩანაწერებში ის მოწყობილობის აღმოჩენამდე სხვადასხვა დღეს ხელმძღვანელთა შეხვედრების ოთახის სიახლოვეს ჩანდა. ფედერალური პროკურორების მტკიცებით, ჩანაწერებში ალფოზანი იმ ტელევიზორის უკანაც იხედებოდა, სადაც მოწყობილობა დაამონტაჟეს.

მოწყობილობა ტუალეტის ქაღალდში იყო გახვეული და დაახლოებით 28 სექტემბერს დაამონტაჟეს. მასში შენახული ინფორმაცია დაშიფრული იყო. იუსტიციის დეპარტამენტი ასევე ამტკიცებს, რომ OpenAI-ის უსაფრთხოების სამსახურმა კომპანიის ოფისის სხვა ოთახში ალფოზანის დატოვებული ჩანთა აღმოაჩინა. ჩანთაში მისი საფულე, პირადობის დამადასტურებელი საბუთი და კიდევ ერთი ჩამწერი მოწყობილობა იპოვეს.

OpenAI-მ განაცხადა, რომ თანამშრომელი გაათავისუფლა და საქმე გამოძიების ფედერალურ ბიუროს (FBI) გადასცა. ალფოზანი პარასკევს დააკავეს და მას შემდეგ პატიმრობაში რჩება. სამშაბათს ის ფედერალური სასამართლოს წინაშე პირველად წარდგა.

OpenAI-მ განაცხადა: „ჩვენ ერთ-ერთ ოფისში დამალული რთული ჩამწერი მოწყობილობა აღმოვაჩინეთ. ჩვენი მოდელები მოწყობილობის შესასწავლად და მისი წარმომავლობის დასადგენად გამოვიყენეთ. ასე გამოვავლინეთ კონკრეტული თანამშრომელი, რომელმაც ის რამდენიმე დღით ადრე დაამონტაჟა. საქმე FBI-ს გადავეცით და მადლიერი ვართ აგენტებისა და პროკურორების, რომლებმაც სწრაფად იმოქმედეს და პირი დააკავეს. FBI-ის გამოძიება გრძელდება და მის მუშაობას კვლავ ხელს შევუწყობთ.

ამ დროისთვის არაფერი მიუთითებს, რომ ამ პირმა მოდელების პარამეტრებზე, საწყის კოდსა ან მომხმარებელთა მონაცემებზე არასათანადო წვდომა მიიღო ან ისინი გაიტანა. თანამშრომელი გავათავისუფლეთ.

ჩვენი ტექნოლოგიის, მონაცემებისა და ადამიანების დაცვას სერიოზულად ვეკიდებით და ამას ეროვნული მნიშვნელობის საკითხად მივიჩნევთ. ჩვენი უსაფრთხოების პროგრამა სხვადასხვა საფრთხისგან დასაცავადაა შექმნილი, მათ შორის შიდა რისკებისგან, კიბერდამნაშავეებისა და სახელმწიფოებისგან. ეს შემთხვევა აჩვენებს, როგორ შეიძლება ხელოვნურმა ინტელექტმა უსაფრთხოების ასეთი რთული საფრთხეების მოგვარებას შეუწყოს ხელი“.