ორი ბელინგემი ერთზე უკეთესია

ტუხელის მიერ გამოძახებულ ძმებს შესაძლოა პირველად მოუწიოთ ერთ გუნდში თამაში.

ჯობე ბელინგემის (სტოურბრიჯი, 2005) გამოძახებამ ერთა ლიგის ხორვატიასა და ესპანეთთან მატჩებისთვის ინგლისში დიდი მოლოდინი გააჩინა. კარიერაში პირველად, შესაძლოა, ის ძმასთან, ჯუდთან (სტოურბრიჯი, 2003), ერთად ითამაშოს.

კლუბებს შორის მსოფლიო ჩემპიონატზე ისინი ერთმანეთს თითქმის დაუპირისპირდნენ, თუმცა ეს ვერ მოხერხდა. ჯობემ ბორუსია დორტმუნდისა და რეალ მადრიდის მეოთხედფინალი გაფრთხილებების დაგროვების გამო გამოტოვა. ახლა კი შესაძლოა, „სამი ლომის“ ნახევარდაცვის ცენტრში ერთად ითამაშონ.

„როგორც კი ეს ამბავი გავიგე, მაშინვე მივწერე, რადგან ვიცი, მათთვის ეს რამდენს ნიშნავს. ჯუდმა მითხრა, რომ ძმასთან თამაშის შესაძლებლობის გამო სიხარულისგან მეცხრე ცაზე იყო“, ამბობს პეპ კლოტეტი. მან მადრიდის რეალის ფეხბურთელს, ბირმინგემ სიტიში, 16 წლის, ერთი თვისა და 27 დღის ასაკში, დებიუტის საშუალება მისცა.

როგორც კი ეს ამბავი გავიგე, მაშინვე მივწერე, რადგან ვიცი, მათთვის ეს რამდენს ნიშნავს. ჯუდმა მითხრა, რომ ძმასთან თამაშის შესაძლებლობის გამო სიხარულისგან მეცხრე ცაზე იყო.

ესპანელმა ჯუდს დებიუტი სენტ ენდრიუსზე ყოფნისას მისცა და ჯობეც გაწვრთნა. „ეს პანდემიის დროს იყო. ბევრი შეზღუდვა მოქმედებდა. თავიდან მხოლოდ ინდივიდუალური, წყვილებში ან მცირე ჯგუფებში ვარჯიში იყო ნებადართული. კლუბმა შემომთავაზა, რომ ჯობე პირველ გუნდთან ერთად გვევარჯიშებინა, რადგან ძმები იყვნენ და ერთად ცხოვრობდნენ. თვენახევარი იყო ჩვენთან, სანამ ფედერაციამ ქვედა ასაკობრივ კატეგორიებში საქმიანობა განაახლა. 13-14 წლისაც კი დიდი ტალანტი ეტყობოდა“, იხსენებს ის „მარკასთან“ საუბრისას.

„არ ვიცი, ეს ძმის სიყვარულის გამო იყო თუ არა, მაგრამ ჯუდი ყოველთვის ამბობდა, რომ ჯობე მასზე უკეთესი იქნებოდა“, ამბობს პეპ კლოტეტი. ის უარყოფს, რომ ინგლისის ნაკრებში უმცროსი ბელინგემის გამოძახება ჯუდის გავლენას უკავშირდება. „არა, არავითარ შემთხვევაში, ამასთან კავშირი არ აქვს, ამაში დარწმუნებული ვარ. ჯობემ ქვედა ასაკობრივ ნაკრებებში კარგად ითამაშა, 21-წლამდელთა ნაკრების კაპიტანია და მეორე ბუნდესლიგაში თამაშის გამოცდილებაც აქვს. ვფიქრობ, ტუხელი, ისევე როგორც ესპანეთში, სწორად იქცევა: მაღალი დონის ახალგაზრდა ფეხბურთელებს შანსი უნდა მისცენ“.

ჯობეს გამოძახებას ჯუდთან ძმობა არ უკავშირდება. ამაში დარწმუნებული ვარ.

შედარება, არა მხოლოდ გარეგნობით, სავსებით ლოგიკურია. „მათ ერთი ძალიან მსგავსი რამ აქვთ: ვერტიკალური, წინ მიმართული დრიბლინგი. ამ მხრივ, შორიდან, შესაძლოა, მათი გარჩევა გამჭირვებოდა. მსგავსია მათი თამაში მცირე სივრცეშიც, ბურთის გაჩერებისა და შემობრუნებისას“, აღნიშნავს „ტრიესტინას“, მოსკოვის „ტორპედოს“, „ბრეშას“, SPAL-ისა და „ოქსფორდ იუნაიტედის“ ყოფილი მწვრთნელი, სხვათა შორის.