პაპ ლეონ XIV-ს ფილტვიდან კვანძს ამოუკვეთენ

ფილტვის კვანძი პათოლოგიური ქსოვილის მასაა, რომელიც უმეტეს შემთხვევაში კეთილთვისებიანია. თუმცა სხვა შემთხვევებში ის შეიძლება სიმსივნური იყოს. ოპერაციის შემდეგ ექიმები შეძლებენ, მისი ბუნება დაადგინონ.

ვატიკანის პრესსამსახურის პრესსპიკერმა მატეო ბრუნიმ მოგვიანებით მოკლე განცხადება გაავრცელა, რომელშიც დამატებითი ინფორმაცია იყო მოცემული: „ჟურნალისტების შეკითხვების პასუხად შემიძლია განვმარტო, რომ პროცედურა მომავალი კვირის დასაწყისისთვისაა დანიშნული. ოპერაციის შემდეგ საავადმყოფოში ყოფნის სავარაუდო ხანგრძლივობა დაახლოებით ერთი კვირაა“.

ჯანმრთელობის პრობლემის გამჟღავნებისას პაპმა ასევე დაადასტურა ურუგვაიში, არგენტინასა და პერუში თავისი მომავალი მოგზაურობა. ვიზიტი 6-დან 17 ნოემბრამდეა დაგეგმილი. ამით მან გამოხატა ოპტიმიზმი, რომ თავისი განრიგის შესრულებას გააგრძელებს. პაპმა ამის შესახებ მაშინ ისაუბრა, როცა წმინდა პეტრეს მოედანზე „სასწაულთა უფლის“ მსვლელობაში მონაწილე პერუელ მორწმუნეებს მიესალმა. მან მათ უთხრა: „მადლობას გიხდით ლოცვებისთვის იმ პასტორალური ვიზიტის გამო, რომელსაც პერუში განვახორციელებ“.

ლეონ XIV-მ ჯანმრთელობის პრობლემა პირველად გაასაჯაროვა მას შემდეგ, რაც 2025 წლის 8 მაისს პაპად აირჩიეს.