ფეხბურთის რეგულატორი კლუბებს ხარჯების მეტად კონტროლს ურჩევს

ანგარიშის პროექტი 250 გვერდისგან შედგება. საბოლოო ვერსია გაზაფხულზე გამოქვეყნდება, ამ კვირიდან დაწყებული რვაკვირიანი საჯარო კონსულტაციის შემდეგ. დოკუმენტი ინგლისის კაცთა ფეხბურთის მძიმე ფინანსურ მდგომარეობას წარმოაჩენს. მისი ერთ-ერთი მკვეთრი დასკვნის თანახმად, 116 წამყვანი კლუბიდან 94% ზარალზე მუშაობს.

ანგარიში რეგულატორისა და კლუბებისთვის მდგრადობის გაუმჯობესების რამდენიმე რეკომენდაციას მოიცავს. IFR-ის თავმჯდომარე დევიდ კოგანი და აღმასრულებელი დირექტორი რიჩარდ მონკსი სამშაბათს მანჩესტერში გამართულ პრესკონფერენციაზე დამატებით დეტალებს წარადგენენ.

ღონისძიებაზე, სავარაუდოდ, მთავარი საკითხი მანჩესტერ სიტის შესაძლო გაყიდვა იქნება. კერძოდ, შეძლებს თუ არა რეგულატორი კლუბის გაყიდვის იძულებას, თუ დამოუკიდებელი კომისიის მიერ მრავალი ბრალდების საფუძველზე გამოტანილი გამამტყუნებელი გადაწყვეტილებები გასაჩივრების შემდეგ ძალაში დარჩება.

IFR მფლობელების, დირექტორებისა და მაღალი რანგის ხელმძღვანელების შეფასების გაფართოებულ პროცედურას მართავს. რეგულატორს მფლობელებისა და ხელმძღვანელების შესაბამისობის შეფასება შეუძლია, „როდესაც ცალკეული პირების მიერ ჩადენილი დარღვევის მკაფიო მტკიცებულებებია“.

„თამაშის მდგომარეობის“ ანგარიშის მომზადება ფეხბურთის მართვის აქტს მოჰყვა, რომელმაც IFR შექმნა. რეგულატორმა ფეხბურთის ინდუსტრიისა და მისი ფინანსების შესახებ დღემდე ყველაზე დეტალური კვლევის მომზადებას ცხრა თვე მოანდომა.

ინგლისის საფეხბურთო ლიგის (English Football League, EFL) კლუბები იმედოვნებენ, რომ ანგარიში პრემიერ-ლიგასთან ახალი ფინანსური შეთანხმების მოლაპარაკებებს დამატებით ბიძგს მისცემს. თუმცა, ეს შესაძლოა არ მოხდეს, თუ დოკუმენტი ქვედა დივიზიონის მრავალი კლუბის გადაჭარბებულ და არამდგრად ხარჯვას გამოავლენს.

პრემიერ-ლიგამ EFL-ს ახალი შეთანხმება შესთავაზა, რომლის ღირებულება 10 წლის განმავლობაში წელიწადში 180 მილიონი ფუნტი იქნება. ეს მოქმედ 150 მილიონ ფუნტთან შედარებით მნიშვნელოვანი ზრდაა. თუმცა, EFL წელიწადში 207 მილიონ ფუნტსა და ხუთი წლის შემდეგ პირობების ხელახლა შეთანხმების შესაძლებლობას ითხოვს.

EFL-მ ფინანსურ სირთულეებში მყოფი კლუბებისთვის ახალი, ე.წ. „სამაშველო ფონდის“ შექმნაც შესთავაზა.

თუ ლიგები შეთანხმებას ვერ მიაღწევენ, IFR-ს მათთვის პირობების დაწესების უფლებამოსილება აქვს. ორივე მხარე, სავარაუდოდ, საკუთარი არგუმენტების გასამყარებლად ანგარიშის ცალკეულ ნაწილებს გამოიყენებს.